Segiz balanyń anasy qolónerge qalaı ýaqyt taýyp júr

NUR-SULTAN. QazAqparat - Búgin elordada «Kórpe Fest» degen atpen kópbalaly analardyń kolynan shyqqan kórpeler kórmesi ótti. Osy sharada 8 ret qursaq kótergen elordalyq «altyn alqa» ıegeri de bolǵan. QazAqparat tilshisi bir qolymen besik terbetip, bir qolymen kórpe tigip júrgen Ásııa Ospanqulovadan ýaqytyn qalaı tıimdi uıymdastyryp júrgenin surap bildi.

Qazaqta tálimi mol bir támsil bar. Sábı dúnıege kelerde «olaq áıeldiń eki qolyn, pysyq áıeldiń bir qolyn baılaımyn» deıtin kórinedi. 40 jasynda segiz qursaq kóterip, bir qolyna besik, bir qolyna urshyq ustaǵan elordalyq Ásııa Ospanqulovany kórgende osy támsil eriksiz eske tústi.

Ol kópbalaly analardyń «Kórpe Fest» atty respýblıkalyq festıvaline aýrýhanada jatqan jerinen bosap kelipti. Naqtyraq aıtsaq, Shymkenttegi aýrýhanada onyń joldasy jatyr. Bul sonyń kútimimen júrgen.

«Ustazymyz Yrza Tursynzada telefon shalyp, Nur-Sultanda kórme ótedi degen soń ushaqpen jetip keldim. Joldasym - ekinshi toptaǵy múgedek. Sonyń kútimimen aýrýhanada júrgenmin. Kórpe tigýdi 4 kúnniń ishinde meńgerip aldym. Búgingi kórmege alǵashqy týyndymdy ákelip otyrmyn», - deıdi Ásııa.

Kópbalaly ananyń elordaǵa qonys aýdarǵanyna 15 jyl bolypty. Qazirgi Túrkistan oblysynyń Ordabasy aýdanyna qarasty Tórtkúl degen jerde balalyq shaǵy qalǵan. Qazir segiz balamen páter jaldap turady. Negizgi jumysy mektepte. Onda oqýshy qyzdarǵa qolónerden sabaq beredi.

«Tiginshilikke baıaǵydan ıkemim bar. Ájemnen qalǵan qasıet eken. Biraq ulttyq naqyshta kórpe tigip, quraq qurap kórmeppin. Іsti ońaı alyp ketýime sol kúndelikti mashyǵym kómektesti», - deıdi ózi.

Mekteptegi jumys, ondaǵy qalyń qujat, segiz balanyń kútimi. Osynyń bárinen qolónerge ýaqyt taýyp júrgen ana balanyń kóptigi eshqashan qolbaılaý bolmaıtynyn aıtady.

«Ózim 13 balanyń ishinde óskenmin. Úlkenderimiz kishilerge qarap, ata-ananyń qadaǵalaýynsyz-aq ósip-jetilgen edik. Endi óz balalarym da solaı ósip jatyr. Tuńǵyshym ana atanyp úlgerse, eń kishisi áli birge de tolǵan joq. Osynyń bári erte úılengenniń arqasynda bir jaǵynan. Shańyraq kótergende men 18-de, joldasym 20-da bolatyn. Qazir balalar bir-birin kıindirip, tárbıelep keledi. Ulttyq qolóner qolyma baılaý bolmaıtyn sııaqty. Kerisinshe, sharshaǵanymdy umyttyryp, shabyt syılap júr», - deıdi Ásııa.

Keıipkerimiz is tigýge qajet oıý túrlerin ınternetten emes, tabıǵattan izdeıdi eken.

«Bala kúnimizden aýylda óstik. Baý-baqsha egip, tabıǵat qushaǵynda júrdik. Qarap otyrsańyz, qazaqtyń oıý-órneginiń bári tabıǵattan alynǵan ǵoı. Men de sóıtemin. Aspan álemi, jazıra dala, shurqyraǵan mal, tákappar túz taǵylary. Osynyń bári keskindeme úshin sarqylmaıtyn qaınar sııaqty. Qııalyńdy oıat ta, ala ber. Ustazymyz Yrza apa bizge únemi bireýdiń kóshirmesi bolmaý kerektigin aıtyp keledi. Sol úshin ınternet aqtara bermeımin», - deıdi kópbalaly ana.

Ásııa Ospanqulova alǵashqy kórpelerin áleýmettik jelige júktegen sátte-aq qyzyǵýshylar paıda bolypty.

«Qazirdiń ózinde tapsyrys túsip jatyr. Súndet toıǵa qajet kórpe jabdyqtaryn jasaýym kerek. Úlken qyzym da tiginge bet buryp júr. Ikemi jaman emes sııaqty. Ekeýlep ol tapsyrysty da ýaqytynda oryndap tastaımyz. Yrza apamyz «eńbekterińniń baǵasyn bilińder» degendi jıi aıtady. Qoldan tigilgendikten, tabıǵı ónim retinde jaqsy baǵalanady. Eger túbegeıli aınalyssa, ulttyq qolónerdiń kómegimen-aq segiz balany emin-erkin asyraýǵa bolady. Biraq oǵan joldasym kónbeıdi. Ózińdi sharshatpaı-aq, balalarǵa qara deıtini bar. Ózi zańger. Sondaı qosaǵym bolǵanyna shúkir», - deıdi Ásııa.