Saıran kólindegi jumystardy merziminen keshiktirgen merdiger jazalandy ma

ALMATY. KAZINFORM – Tamyz aıynda Almaty ákimdigi Saıran kólin abattandyrý jobasynyń bas merdigeri – «Pavlodarskıı rechnoı port» AQ qatysty sotqa talap aryz túsirdi.

Oǵan merdigerdiń shart boıynsha mindetterin ýaqtyly ári sapaly oryndamaýy sebep boldy.

Kazinform tilshisi qala ákimdigine saýal joldap, merdigerge qatysty qandaı sheshim qabyldanǵanyn surady.

Sotqa shaǵym túsirgen qoǵamdyq keńistikterdi damytý basqarmasy qazir Almaty qalasynyń mamandandyrylǵan aýdanaralyq ekonomıkalyq sotynyń sheshimimen «Pavlodarskıı rechnoı port» AQ memlekettik satyp alýdyń adal qatysýshysy emes dep tanylǵanyn habarlady. Alaıda sot úkimi zańdy kúshine ázirge enbegen.

- Qazirgi ýaqytta «Pavlodarskıı rechnoı port» AQ-na qatysty sot isi barlyq sot ınstantsııalarynan tolyq ótpedi. Sot talqylaýlary jalǵasýda, sondyqtan sheshim zańdy kúshine engen joq, - delingen vedomstvo jaýabynda.

Vedomstvo málimetinshe, qazir Saıran kólinde iske qosý-jóndeý jumystary jáne beınebaqylaý kameralaryn iske qosý, avtomatty sýarý júıesin qaıta jabdyqtaý jumystary atqarylyp jatyr.

Sondaı-aq basqarma óz jaýabynda qysqy kezeńde Saıran kóline sý berý ýaqytsha toqtatylatynyn atap ótti. Biraq sý berýdiń toqtaýy týraly naqty ýaqytty habarlaǵan joq.

Eske salaıyq, buǵan deıin jańarǵan Saıran kólinde qandaı jumystar qalǵanyn jazǵanbyz.

Jaz kezinde Saıran kólinde sýǵa túsýge tyıym salyndy.