«Saıram-Ógem» ulttyq parkinde fototuzaqqa sırek kezdesetin janýarlar ilikti
ASTANA. KAZINFORM — «Saıram-Ógem» memlekettik ulttyq tabıǵı parkiniń aýmaǵynda ornatylǵan fototuzaqtarǵa sırek kezdesetin jabaıy janýarlar – Túrkistan sileýsini, Úndi jaırasy, qasqyr jáne Sibir eligi túsip qaldy.
Bul kadrlar Qazaqstannyń ońtústiginde mekendeıtin janýarlar áleminiń alýan túrliligin taǵy bir márte dáleldeıdi.
Ulttyq park qyzmetkerleriniń aıtýynsha, fototuzaqtar tek janýarlardy beınejazbaǵa túsirip qana qoımaı, olardyń qaýipsizdigin qamtamasyz etýge de kómektesedi. Qys mezgilinde bıotehnıkalyq is-sharalar kúsheıtilip, jabaıy ańdarǵa jem-shóp qory daıyndaldy.
Aıta ketý kerek «Saıram-Ógem» MUTP aýmaǵynda barlyq ańshylyq túrine qatań tyıym salynǵan. Janýarlar popýlıatsııasyn saqtaý maqsatynda turaqty túrde tabıǵat qorǵaý sharalary júrgizilip jatyr.
Baıanaýyl memlekettik ulttyq tabıǵı parki aýmaǵynda orman sheberi Aryn túngi ýaqytta jol jıeginde sileýsinniń qoıan aýlaý sátin baıqap, sırek kezdesetin kadrlardy túsirip alǵan.
Sileýsin (Lynx lynx) – sútqorektiler klasy jartqyshtar otrıadynyń mysyqtar tqymdasyna jatatyn jyrtqysh ań. Sileýsin taýly alqaptardyń qylqan japyraqty jáne jalpaq japyraqty orman ósken beldeýlerinde taralǵan. Denesiniń uzyndyǵy 87-104 sm, salmaǵy 13,2-23,2 kg. Sileýsinniń denesi myǵym, basy jumyr, úshburyshty qulaqtarynyń ushynda aıqyn kórinetin qara shashaqty shoqtary bolady.
2024 jylǵy sanaq boıynsha, Baıanaýyl ulttyq parkiniń aýmaǵynda 42 sileýsin mekendeıdi.
Sonymen qatar Batys-Altaı qoryǵynyń memlekettik ınspektorlary aýmaqty aralaý kezinde bulǵyndy vıdeoǵa túsirip aldy.
Bulǵyn (lat. Martes zibellina) – sýsarlar tuqymdasynyń sýsarlar týysyna jatatyn jyrtqysh sútqorekti ań.
Dene turqy 40 – 55 sm, quıryǵy – 20 sm-deı, salmaǵy 0,4 – 1,6 kg. Qazaqstanda Altaıdyń qylqan japyraqty ormandarynda kezdesedi.
Usaq jándiktermen, kemirgshtermen, tıinmen, qoıanmen, balqaraǵaı jańǵaǵymen, jıdekpen qorektenedi. Shyrshaly, balqaraǵaıly ormandardaǵy aǵash dińderi men tas qýystardy mekendeıdi.
Aıta ketelik Qostanaıda sırek kezdesetin janýarlardy aýlaýmen aınalysqan brakonerler ustalǵan edi.