Saıram aýdanynda kásipkerler 84 mlrd teńgeniń ónimin óndirgen - OQO

ShYMKENT. QazAqparat  - Ońtústik Qazaqstan oblysy, Saıram aýdanyndaǵy turǵyndardyń 12,5 paıyzy shaǵyn jáne orta bıznes salasynda jumyspen qamtylǵan. Aýdan boıynsha belsendi kásipkerlik sýbektilerdiń sany 13 myńnan asyp, shaǵyn jáne orta kásipkerlik nysandary 84, 2 mlrd teńgeniń ónimin óndirgen. Bul týraly búgin el aldynda esep bergen aýdan ákimi Baqtııar Mamaev málimdedi, dep habarlaıdy  QazAqparat tilshisi.

Atalǵan jıynǵa aýdanǵa saparlap barǵan oblys ákimi Janseıit Túımebaev ta arnaıy qatysyp, atqarylǵan jumystarǵa qanyqty. Aýdan basshynynyń aıtýynsha, ótken jyly Saıramda 58,9 mlrd teńgeniń aýyl sharýashylyq ónimi óndirilgen. Sondaı-aq  8,1 gektar jerge jylyjaı salynyp, tamshylatyp sýǵarý ádisi 111 gektar jerge endirildi. Al, «Sybaǵa» baǵdarlamasy boıynsha 280 bas iri qara, «Altyn asyq» baǵdarlamasymen 200 saýlyq jáne 7 asyl tuqymdy qoshqar satyp alynsa, «Qulan» baǵdarlamasy arqyly 32 bas jylqy alynyp, aýdandyq kórsetkishter jospary tolyq oryndalǵan.

«Aýdanda 34 kooperatıv qurylyp, jalpy sany 45-ke jetti. Jalpy aýdanda 103 shaǵyn mal bordaqylaý alańdary men 41 januıalyq sút aýlalary ashyldy. Óńirdegi 887 mal bordaqylaý alańdarynda bir mezette 31 myń bas mal bordaqylanýda. Nátıjesinde mal sharýashylyǵynda 32,5 mlrd teńgeniń ónimi óndirilip, 2016 jylmen salystyrǵanda 9,7 paıyzǵa artyp otyr», - dedi Baqtııar Mamaev.

Eseptik jıynǵa qatysqan oblys ákimi Janseıit Túısebaev aýdan ákiminiń jumysyn oń baǵalap, tısti tapsyrmalar berdi.

«Elbasymyz bıylǵy halyqqa arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýynda «Úshinshi baǵyt - «Aqyldy tehnologııalar» - agroónerkásip keshenin qarqyndy damytý múmkindigi degen bolatyn. Agrarlyq saıasat eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtýǵa baǵyttalýy kerek. Osy baǵytta Saıram aýdany óziniń óndiristik-ekonomıkalyq potentsıalymen oblystaǵy perspektıvti aýdan bolyp eseptelinedi. Sondyqtan aýdan basshysyna osy múmkindikterdi barynsha tıimdi paıdalanýdy tapsyramyn. Sondaı-aq, aýdanǵa ınvestıtsııa tartý, jańa óndiris oryndaryn ashý, shaǵyn jáne orta kásipkerlikti damytý baǵytynda jańa serpin qajet», - dedi Janseıit Túımebaev.

Esep berý barysynda aýdan ákimi turǵyndar tarapynan áleýmettik salada qoıylǵan suraqtarǵa jaýap berip, ózekti máselelerdiń aldaǵy ýaqytta zerdelenip, saraptalatynyn aıtty.