Saıram aýdanynda boıjetken esirtkimen ustaldy

SAIRAM. QazAqparat – Saıram aýdanynda sıntetıkalyq esirtkini saqtady degen kúdikpen jas qyz ustaldy, dep habarlaıdy QazAqparat Túrkistan oblysy PD baspasóz qyzmetine silteme jasap.

Polıtsııa departamenti Esirtki qylmysyna qarsy is-qımyl basqarmasyna belgisiz tulǵadan esirtkige baılanysty habarlama kelip túsedi. Jedel-izdestirý is-sharalaryn júrgizý barysynda Saıram aýdany aýyldarynyń birinde jol boıynda kúdikti jas qyz ustaldy. Ol Shymkent qalasynyń turǵyny bolyp shyqty.

Tekserý kezinde boıjetkenniń qol sómkesinen paketke oralǵan ishinde esirtkige uqsas zaty bar 6 dana orama tabyldy. Bolǵan jaıt QR QK-niń 296-baby 4-bóligi «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» boıynsha SDTBT-ǵa tirkeldi.

Polıtseıler tárkilengen aıǵaqty zatty saraptamaǵa joldady. Onyń qorytyndysy boıynsha zattyń jalpy salmaǵy 3 gramnan asatyn «sıntetıkalyq esirtki» ekeni anyqtaldy.

Qazirgi ýaqytta kúdikti qamaýǵa alynyp, oǵan qatysty sotqa deıingi tergeý amaldary júrgizilýde.

Tergeý barysy oqıǵanyń tolyq mán-jaıyn anyqtaıtyn bolady.