Saıram aýdanynda aıyna 2 mln dana betperde shyǵaratyn tseh iske qosyldy

SAIRAM. QazAqparat – Túrkistan oblysy, Saıram aýdanynda aıyna 2 mln dana betperde shyǵaratyn tseh iske qosyldy. Medıtsınalyq betperde óndirý jobasyn «S MEDICAL» JShS iske asyrýda, dep habarlaıdy QazAqparat tilshisi.

Óndiriske qajetti qural–jabdyqtar Qytaı elinen ákelingen. Seriktestik dırektory Májıt Máýlenovtyń aıtýynsha, atalǵan jobanyń quny 80,4 mln teńgeni quraıdy. 30 adamǵa jańa jumys orny qurylyp, qazirgi tańda táýligine 80 myń dana betperde shyǵarylýda.

«Bul úlken joba aıasynda bir rettik medıtsınalyq-hırýrgııalyq jabdyqtardy óndirý josparlanǵan. Alaıda, keshegi koronavırýs pandemııasynyń birinshi tolqynda qarapaıym maskany tabýdyń ózi qıynǵa soqty. Sondyqtan eń áýeli maska shyǵarýdy qolǵa aldyq», – deıdi kásipker.