Saılaýshylar tizimi qalaı qurylady – OSK

NUR-SULTAN. QazAqparat – QR Ortalyq saılaý komıssııasy tóraǵasynyń orynbasary Konstantın Petrov azamattardy saılaýshylar tizimine engizý erejesin túsindirdi, dep habarlaıdy QazAqparat tilshisi.

«QR saılaý týraly» Konstıtýtsııalyq Zańnyń 24-babyna sáıkes, saılaýshylar tizimine respýblıkanyń belsendi saılaý quqyǵy bar azamattary engiziledi. Saılaýshylardyń turǵylyqty jeri boıynsha tizimin jergilikti atqarýshy organ Jeke tulǵalar týraly memlekettik derekqor negizinde jasaıdy. Naqty bir saılaý ýchaskesine azamatty saılaýshylar tizimine engizý úshin onyń tirkelýi, ıaǵnı osy saılaý ýchaskesiniń aýmaǵynda turý faktisi negiz bolady», - dedi K. Petrov OSK otyrysynda.

Al ýaqytsha tirkelgen azamattar jergilikti atqarýshy organǵa bergen ótinishti negizinde saılaýshylar tizimine enedi.

«Bul rette jergilikti atqarýshy organ azamatty turaqty tirkelgen jeri boıynsha tizimnen shyǵarýǵa mindetti bolady. Zańda árbir azamattyń saılaýshylardyń bir ǵana tizimine enýge quqyǵy týraly norma naqty belgilengen. Árbir saılaýshy «QR saılaý týraly» Konstıtýtsııalyq zańǵa sáıkes, daýys berý kúnine deıin 30 kúnnen keshiktirmeı saılaýshy retinde tirkelýge quqyly. Mundaı múmkindik QR árbir azamatynda boldy. ıAǵnı, konstıtýtsııalyq zań árbir azamatqa ózin saılaýshylar tizimine engizý boıynsha zańdyq mańyzy bar áreketter jasaýyn qarastyrady», - dedi K. Petrov.

Buǵan deıin QR Densaýlyq saqtaý vıtse-mınıstri – QR Bas memlekettik sanıtarlyq dárigeri Erlan Qııasov saılaý kezindegi sanıtarlyq normalardy saqtaý erejelerin túsindirgen edi.