Saılaý týraly zańda ınternet-memge qatysty túsinikteme joq - zańger

NUR-SULTAN. QazAqparat - «Zańgerler - ádil saılaý úshin» respýblıkalyq qoǵamdyq birlestiginiń ókili qoldanystaǵy zańnamada saılaý kezinde ınternet memder taralýyn retteý máselesi qarastyrylmaǵanyn aıtty, - dep habarlaıdy QazAqparat tilshisi.

Zań ǵylymdarynyń doktory, Marat Qoǵamovtyń aıtýynsha, Saılaý týraly zańnyń «Saılaý aldyndaǵy úgit» dep atalatyn 27-babynda ınternet-memderge qatysty túsiniktemeler joq.

«Eger ınternet-mem telekommýnıkatsııa jelileri arqyly taralyp, qorlaý nemese jala jabý sıpatynda bolsa, avtorlaryn, taratqan BAQ-tyń menshik ıesin kandıdattar Qylmystyq kodekstiń tıisti baptary boıynsha jaýapqa tarta alady. Mundaı aqparattardyń taralýy kóbinese ınternet-BAQ-qa qatysty. Internet-BAQ-tyń atalmysh áreketke jol bergeni dáleldense, jumysy sot sheshimi boıynsha toqtatylýy nemese toqtatyla turýy múmkin», - dedi zańger.