Saılaý: Eldegi 8,2 myń ýchaskede daýys berý bastaldy

ASTANA. QazAqparat – Elimiz óńirlerindegi 8 272 ýchaskede daýys berý bastaldy. Bul týraly Ortalyq saılaý komıssııa tóraǵasynyń orynbasary Konstantın Petrov aıtty, dep habarlaıdy QazAqparat tilshisi.

«Ortalyq saılaý komısssııasy oblystardyń, Astana, Almaty, Shymkent qalalarynyń komıssııalary usynǵan aqparattyna sáıkes, 07.00-degi jaǵdaı boıynsha óńirlerde 8 272 ýchaskede daýys berýdiń bastalǵanyn habarlaıdy. Sondaı-aq Qazaqstan Respýblıkasynyń 12 shet memlekettegi 13 ýchaskesinde daýys berý bastaldy. 92 ýchaskede aýmaqtyq komıssııalardyń Konstıtýtsııalyq zań aıasynda qabyldanǵan sheshimderine sáıkes, daýys berý tańǵy saǵat 06.00-de bastaldy. 5 óńirdiń, Aqtóbe, Atyraý, Batys Qazaqstan, Mańǵystaý, Qyzylorda oblystarynyń 1 887 ýchaskesinde daýys berý astana ýaqytymen saǵat 08.00-de bastalady. Barlyǵy 10 223 ýchaskesi, onyń ishinde 62 shet memlekettegi elimizdiń 77 ýchaskesi bar», - dedi Konstantın Petrov.

Onyń atap ótýinshe, saılaýshylar tizimine 12 mln 32 550 adam bar. Ýchaskelik komıssııalar azamattardyń jazbasha ótinishteri boıynsha daýys berý quqyǵyn beretin barlyǵy 12 765 esepten shyǵarý kýáligin berdi.

Búgin ýchaskelerde daýys berý jergilikti ýaqyt boıynsha saǵat 07:00-den 20:00-ge deıin júrgiziledi. Ýchaskelik saılaý komıssııalary jergilikti ýaqyt boıynsha saǵat 20:00-de daýys sanaýdy, daýys berý nátıjeleri týraly hattama jasaýdy bastaıdy.

Ýaqyt beldeýine baılanysty keıbir shet memleketterde daýys berý bizden erte bastalady. Qazaqstandyqtar ómir súretin Eýropa, Ulybrıtanııa, Reseı, AQSh, Qytaı, Koreıa, Úndistan syndy birqatar memlekette 77 daýys berý ýchaskesi ashylǵan.

Bul joly daýys sanaý protsedýrasy uzaqqa sozylady. Sebebi bıýlletender sany ádettegiden kóp. Biraq, zań boıynsha daýystardy sanaý 12 saǵattan aspaýy tıis. Daýystardy sanaý barlyq saılaý ýchaskelerinde tańǵy 8:00-de aıaqtalady.

Respýblıkalyq mańyzy bar qalalarda (Astana, Almaty jáne Shymkent) daýys berý tórt bıýlleten boıynsha sanalady. Onyń ekeýi Parlament Májilisi depýtattaryn saılaý jáne ekeýi – máslıhattar boıynsha. Al 17 oblysta daýys berý bes saılaý bıýlleteni boıynsha ótpek. Onyń ekeýi Májilis boıynsha, ekeýi – oblystyq máslıhattar boıynsha jáne bireýi – aýdandyq nemese qalalyq máslıhat bıýlletenderi.

QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady. Májilis depýtattarynyń saılaýyna elimizde resmı tirkelgen 7 partııa da túsip jatyr.

Eske sala ketsek, 19 qańtarda Memleket basshysy Qasym-Jomart Toqaev jetinshi saılanǵan QR Parlamentiniń Májilisin taratý jáne 19 naýryz kúni Parlament Májilisi depýtattarynyń kezekten tys saılaýyn belgileý týraly Jarlyqqa qol qoıǵan edi. Bul kúni Májilispen qatar máslıhat depýtattaryn da kezekten tys saılaý usynyldy.

Májilis saılaýyn baıqaýǵa 41 shet memleket pen 12 halyqaralyq uıymnan 793 baıqaýshy resmı tirkeldi.