Saılaý-2022: Daýys berý kúni qalaı ótedi

ASTANA. QazAqparat- Elordada kezekten tys QR Prezıdenti saılaýyna daıyndyq jáne ony ótkizýi máseleleri boıynsha keńes ótti, dep habarlaıdy QazAqparat tilshisi.

Jıyn barysynda Ortalyq saılaý komıssııasy tóraǵasynyń orynbasary Konstantın Petrov aldaǵy saılaýdy ótkizý kezeńderin túsindirdi.

«21 qazan saǵat 18:00-den bastap 19 qarasha, senbi saǵat 0:00-ge deıin elimizde saılaýaldy úgit-nasıhat jumystary júrgiziledi. Senbi, ıaǵnı daýys berý kúniniń aldyndaǵy kúni barlyq úgit-nasıhatqa tyıym salynady. 20 qarasha, jeksenbide biz daýys berýdi uıymdastyrýymyz kerek. Eki kún ishinde Ortalyq saılaý komıssııasy 20 aımaqtan hattamalar jınaıdy. Bir apta ishinde biz saılaý nátıjelerin anyqtap, saılanǵan Prezıdentti tirkeımiz»,-dedi Konstantın Petrov.

Sondaı-aq, ol daýys berý kúni qalaı ótetinin túsindirip berdi.

«Jergilikti ýaqyt boıynsha saǵat 7:00-den 20:00-ge deıin daýys berý ótedi. Saılaý ýchaskeleri bir saǵat buryn ashylady. Daýystardy sanaý daýys berý aıaqtalǵannan keıin birden júzege asyrylýy kerek. Ony sanaý uzaqtyǵy 12 saǵattan aspaýy tıis. Daýystardy sanaý aıaqtalǵannan keıin birden hattama jasalady», - dep málim etti Ortalyq saılaý komıssııasy tóraǵasynyń orynbasary.

Budan ózge, keńes barysynda Konstantın Petrov pen OSK múshesi Sabıla Mustafına azamattardyń suraqtaryna jaýap berdi.