Saılaý-2021: «ADAL» partııasynyń tóraǵasy daýys berdi
Partııa tóraǵasy elordadaǵy «Astana Opera» teatrynda ornalasqan №115 saılaý ýchaskesine kelip, óz tańdaýyn jasady.
«Bul saılaýdyń ózindik ereksheligi bar. Jalpy, halqymyzdyń saıası deńgeıiniń kóterilgenin baıqaýǵa bolady. Sonymen qatar, osy naýqanda kóbine jastarǵa jol berilip otyr. Jastarymyz bilimdi ári bilikti. Olar qysqa merzimde barlyq salada ózderin tanyta aldy», - dedi S. Sultanǵalı.
Partııa tóraǵasy osy saılaýdan keıin jaqsy nátıje kútetinin atap ótti.
«Táýelsizdigimizdiń 30 jyldyǵyna aıaq bastyq. Osy oraıda bir qýanatyn jaǵdaı – jastarymyz saýatty. Eń negizgisi – olarda patrıotızm sezimi bar», - dedi Serik Sultanǵalı.
Eske sala ketsek, búgin Qazaqstan aýmaǵynda qurylǵan barlyq saılaý ýchaskesinde daýys berý júrip jatyr.
Depýtattardy saılaý boıynsha daýys berý Qazaqstan Respýblıkasynyń aýmaǵynda jáne odan tysqary jerde qurylǵan 10 060 saılaý ýchaskesinde júrgizilip otyr. Saılaý komıssııalary daýys berý orny men ýaqyty týraly der ýaqytynda aqparat berdi. Elorda ýaqytymen saǵat 08.00-de jaǵdaı boıynsha elimizdegi 9 994 saılaý ýchaskesinde jáne shet memleketterdegi qazaqstan ókildikteri janyndaǵy 17 saılaý ýchaskesinde daýys berý bastaldy.
Konstıtýtsııalyq merzimge saı ótip jatqan Májilis saılaýyna elimizde tirkelgen 5 saıası partııa, atap aıtqanda, «Aýyl» halyqtyq-demokratııalyq patrıottyq partııasy, «Nur Otan» partııasy, «ADAL» saıası partııasy, Qazaqstannyń «Aq jol» demokratııalyq partııasy, «Qazaqstannyń Halyq partııasy» depýtattyq mandattan úmitti.
