Saılaý-2019: Halyqaralyq baıqaýshylardy akkredıtteý qashan aıaqtalady

NUR-SULTAN. QazAqparat - 2019 jylǵy 9 maýsymda ótetin QR Prezıdentiniń kezekten tys saılaýyna halyqaralyq baıqaýshylardy tirkeý 3 maýsym saǵat 18:00-ge deıin júrgiziledi, dep habarlaıdy QazAqparat tilshisi.

Ortalyq saılaý komıssııasynyń múshesi Záýresh Baımoldına Syrtqy ister mınıstrliginen birqatar Mıssııalardyń baıqaýshylaryn akkredıtteýge usynystar kelip túskenin jetkizdi.

«23-30 mamyr aralyǵynda Syrtqy ister mınıstrliginen birqatar Mıssııalardyń baıqaýshylaryn akkredıtteý týraly usynystar kelip tústi. TMD Mıssııasynan - 323 baıqaýshy, TMD Parlamentaralyq Assambleıasynan - 15, EQYU/DIAQB mıssııasynan - 263, UQShU Parlamenttik assambleıasynan - 18, Túrkitildes memleketter yntymaqtastyǵy keńesinen - 9, ShYU mıssııasynan - 1 baıqaýshy», - dedi Z. Baımoldına.

Sonymen birge, taǵy 31 memleketten 91 baıqaýshy usynylyp otyr, olardyń qatarynda Úndistan, Indonezııa, Qyrǵyzstan, Rýmynııa, Tájikstan, Túrikmenstan jáne Ózbekstannyń ortalyq saılaý organdarynyń ókilderi bar.

«Akkredıtteýge derekterdiń túsýine qaraı, baıqaýshylar týraly aqparat jańartylyp otyrady. Shet memleketter men halyqaralyq uıymdardyń baıqaýshylaryn akkredıtteý 2019 jylǵy 3 maýsym saǵat 18.00-ge deıin jalǵasady», - dedi Záýresh Baımoldına.

31 mamyrǵa deıin halyqaralyq uıymdar men shet memleketterden 967 baıqaýshyny akkredıttelgen.