Saılaý-2019: «Aýyl» partııasynyń úmitkeri bekitildi
Úmitker kandıdatýrasyn astanada ótken «Aýyl» halyqtyq-demokratııalyq partııasynyń kezekten tys XV sezinde biraýyzdan qabyldady.
Partııa tóraǵasy Álı Bektaev Tóleýtaı Rahymbekovtiń aýyl sharýashylyǵy mamandary arasynda tanymal ekenin, oǵan 300 myńnan astam partııa músheleriniń senim artyp otyrǵanyn jetkizdi.
«Maǵan senim bildirip, partııa atynan meniń kandıdatýramdy usynǵandaryńyz úshin alǵys bildirgim keledi. Men úshin bul joǵary mártebe jáne óte úlken jaýapkershilik. Elimiz mańyzdy saıası kezeńdi bastan ótkerip jatyr. Men úmitker retinde aldaryńyzda jaýapkershilik júgin tolyq sezinemin. Aýyl partııasynyń múshesi retinde partııanyń saıası ustanymdary men negizgi qujattary jáne sizder aıtqan búgingi usynystar meniń keleshektegi saılaýaldy baǵdarlamama negiz bolady. Meniń sanaly ǵumyrym aýylmen, aýyl sharýashylyǵymen baılanysty. Ózim aýylda týdym, aýylda óstim, aýyl sharýashylyǵy salasynyń damýy jolynda eńbek etip kelemin. Bul saladaǵy problemalar «Aýyl» partııasynyń nazarynan eshqashan tys qalǵan emes. Aýyl - Qazaqstannyń áleýmettik-ekonomıkalyq damýynyń negizi», - dep atap ótti
Sonymen birge, T. Rahymbekov partııa prıntsıpterine negizdelgen saıası platformada birqatar máselege kóńil bólingenin atap ótti.
«Aýylda ómir súrý sapasynyń joǵary standarttaryn qalyptastyryp, aýyl men qalanyń damýyndaǵy áleýmettik sáıkessizdikti joıý. Aldymen ishki naryqty elimizde óndirilgen joǵary sapaly tabıǵı aýylsharýashylyq ónimdermen qamtamasyz etý. Aýyldarda damyǵan zamanaýı, ınjenerlik, áleýmettik jáne óndiristik ınfraqurylymdy qalyptastyrý. Qazaqstandy bilim berý, densaýlyq saqtaý jáne áleýmettik damýdyń laıyqty júıesi bar memleketke aınaldyrý. Elimizdiń basty baılyǵy sanalatyn birlik, yntymaqtastyq,
turaqtylyq qundylyqtaryn bıik ustap, laıyqty jalǵastyrý», - dedi úmitker.
T. Rahymbekov óziniń eńbek jolynda túrli salalarda tájirıbe jınaqtaǵanyn atap ótti.
Eske sala ketsek, 9 sáýirde respýblıkalyq telearnalardan Qazaqstan halqyna úndeý jarııalaǵan Memleket basshysy Qasym-Jomart Toqaev elimizdiń Konstıtýtsııasyna sáıkes QR Prezıdentiniń kezekten tys saılaýyn 2019 jyldyń 9 maýsymynda ótkizý jóninde sheshimin jarııalady.
Aıta keteıik, 23 sáýir kúni Nur Otan partııasy atynan Qazaqstan Respýblıkasynyń Prezıdenttigine kandıdat retinde Qasym-Jomart Toqaev tirkeldi.
Keshe «Aq jol» demokratııalyq partııasynyń kezekten tys XV quryltaıy Danııa Espaevany resmı túrde prezıdenttikke úmitker retinde bekitti.
Odan bólek, «Uly dala qyrandary» respýblıkalyq qoǵamdyq birlestigi atynan qoǵam qaıratkeri, jazýshy-jýrnalıst Sádibek Túgel kandıdat retinde tıisti qujattaryn tapsyrdy.
Búgin «Qazaqstan Respýblıkasynyń kásipodaqtar federatsııasy» Respýblıkalyq kásipodaqtar birlestigi atynan QR Prezıdenttigine kandıdat retinde Amangeldi Taspıhov ótinim berdi.
