Saıys kúni komandamyzben ýlanyp qaldyq - Evgenıı Koshkın

ALMATY. KAZINFORM – Harbınde ótip jatqan qysqy Azııa oıyndaryna qatysqan bir top sportshy Almatyǵa keldi. 

Kazinform tilshisine bergen suhbatynda erler arasynda 100 metrge konkımen júgirýden qysqy Azııa oıyndarynyń kúmis júldegeri Evgenıı Koshkın saıys kúni as-aýqattan ýlanyp qalǵanyn aıtty.

- Elimizdiń qoldaýyn sezindim. Jarys jaqsy ótti. Biraq saıys kúni komandamyzdyń birneshe adamy, onyń ishinde ózim de ýlanyp qaldym. Sondyqtan bolar, mende 500 metrge saıys sátti shyqpady. Neden ýlanǵanymyzdy naqty bilmedim, biraq jaǵdaıymyz aýyr boldy. Áıteýir jarys bastalǵansha esimizdi jınap aldyq, - dedi ol.

Sonymen qatar Azıadanyń kúmis júldegeri aldaǵy ýaqytta álem kýbogynyń 5 jáne 6-shy kezeńderine, sosyn álem chempıonatyna qatysýdy josparlap otyrǵanyn atap ótti. Al jazǵy ýaqytta sportshy Olımpıadaǵa daıyndalýǵa nıetti.

Evgenıı Koshkın jarysqa attanǵan Ulttyq quramanyń sporttyq formasy men Harbınde alǵan medaldyń sapasyna baılanysty pikir bildirdi.

- Sporttyq formamyzdy alǵash kórgen kezde onyń sapasy tańqaldyrdy. Óte sapaly ári Harbın úshin óte jyly boldy. Al medaldyń sapasyna kelsek, osy ýaqytqa deıin ol mende qoraptyń ishinde boldy. Sondyqtan biraz ýaqyttan keıin ne bolaryn bilmeımin. Degenmen, aýyr ári ádemi, sol sebepti Parıj Olımpıadasyndaǵy medaldardyń «taǵdyryn» qaıtalamaıdy dep oılaımyn, - dedi sportshy.

Eske salaıyq, buǵan deıin Azıadanyń ekinshi medalin Evgenıı Koshkın jeńip alǵanyn jazǵanbyz.