Saıası pikirsaıys: partııa ókilderi tikeleı efırde ne aıtty
Pikirsaıysqa «Amanat» partııasynan Erlan Qoshanov, «Aýyl» halyqtyq demokratııalyq patrıottyq partııasynan Jıgýlı Daırabaev, «Respublica» partııasynan Aıdarbek Qojanazarov, «Qazaqstan halyq partııasynan» Oksana Áýbákirova, Qazaqstannyń «Baıtaq» jasyldar partııasynan Azamathan Ámirtaev, «Aq jol» Qazaqstan demokratııalyq partııasynan Azat Perýashev, al «Jalpyulttyq sotsıal-demokratııalyq partııasynan» Nurlan Áýesbaev qatysty.
«Amanat» mıllıondaǵan jaqtas tapty»
«Amanat» partııasy osy 1 aıdyń ishinde Arqalyqtan Qonaevqa deıin, Qyzyljardan Qarataýǵa deıin, Zaısannan Qulsaryǵa deıin elimizdiń tórt buryshyn túgel aralap shyqty. Shalǵaı aýyldarǵa deıin bardyq. Eldiń muńyn da, synyn da tik turyp tyńdadyq. Mıllıondaǵan jaqtas taptyq. Halqymyzdyń partııaǵa úmitpen qarap, qoldap otyrǵanyna kózimiz jetti», - dedi Erlan Qoshanov pikirsaıys barysynda.
Onyń atap ótýinshe, partııanyń saılaýaldy baǵdarlamasy – naqty is-qımyl jospary. Ony júzege asyrý úshin partııa barlyq deńgeıdegi kandıdattardy usynyp otyr. Jalpy, partııa saılaýǵa jalǵan uransyz, bos ýádesiz túsip jatyr.
Foto: t.me/AMANATPartiyasy
«Saılaýshylar bizdiń saıası adaldyǵymyzdy baǵalaıtyndyǵyna senimdimiz. Búginde ár ýaqytta bizdi synap kelgender de senim artyp otyr. Bizdiń barlyǵymyzdy osydan bir jyl buryn Prezıdentimiz aldymyzǵa qoıǵan maqsat-mindetter biriktiredi. Ashyǵyn aıtaıyq, jyldar boıy qordalanǵan, jurttyń júıkesin juqartqan máseleler de kóp. Halqymyz olardyń shuǵyl sheshilýin kútip otyr.
Birinshi – halyqtyń turmysyn jaqsartý. Biz azamattardyń tabysyn arttyrý úshin naqty is-sharalar qabyldaımyz. Jumyssyzdyqpen júıeli túrde kúresemiz. Ekinshi - jemqorlyq pen ádiletsizdik. Biz urlanǵan, shetel asqan mıllardtaǵan qarjyny elge qaıtaramyz. Sot pen prokýror, polıtsııa, ákimder men sheneýnikter azamattarymyzǵa qojaıyn emes, qorǵan bolýy tıis. Bul salaǵa túbegeıli reforma jasaımyz. Úshinshi – tártip pen qaýipsizdik. Halyq memlekettiń táýelsizdigi men turaqtylyǵy úshin, qoǵam kóshe men aýladaǵy tártip úshin, ata-ana oqýdaǵy, áskerdegi balalarynyń qaýipsizdigi úshin alańdamaýy tıis. «Amanat» partııasy osy túıtkildi máselelerdi sheshýge bar kúshin salady», - dedi partııa tóraǵasy.
«Taza tabıǵatta ómir súrýge jaǵdaı jasalady»
Al, «Baıtaq» jasyldar partııasynyń tóraǵasy Azamathan Ámirtaev partııanyń negizgi maqsaty adamdardyń densaýlyǵy men quqyqtaryn qorǵaýǵa, taza energetıkany damytýǵa erekshe mán berý ekendigin aıtady.
«Baıtaq» partııasynyń negizgi maqsaty – azamattardyń quqyqtaryn qorǵaý, halyqtyń densaýlyǵy men óndiristiń zamanaýı taza tehnologııalaryna baǵyttalǵan qýatty ekonomıka qurý. Biz úshin ádildiktiń joǵary kórinisi – adamnyń ómiri men densaýlyǵyn saqtaý. Partııa jaqynda tirkelse de, qozǵalys retinde 10 jyldyq tájirıbesi bar. Bizdiń kandıdattarymyz tabıǵı resýrstardy ashkózdikpen aıaýsyz ıgerýge qarsy», - dedi Azamathan Ámirtaev.
Foto: t.me/tvkhabar24
Osy oraıda, ol partııa quramynda barlyq salanyń mamandary qamtylǵanyn aıtty.
«Bizdiń partııamyzda ekologııany qorǵaýshylar, ǵalymdar, zańgerler, ekonomıster, menedjerler, kásipkerler, qoǵam qaıratkerleri, dárigerler, muǵalimder bar. Sonymen qatar, ár óńirdegi qoǵam belsendileri bizdiń partııamyzdyń múshesi bolyp otyr. Bizdiń kandıdattar qalyń buqaramen saılaý naýqanynda 3 700 jınalys, kezdesý ótkizdi», - dedi partııa tóraǵasy.
Onyń aıtýynsha, partııa ókilderi áleýmettik jeliler arqyly 4,5 mln adamdy qamtyǵan.
«Partııa músheleri halyqqa platformany túsindirdi. Halyqtyń talaptary negizinde Májilis pen máslıhattardaǵy partııanyń is-qımyl josparyn jasap qoıdyq. Adamdardyń densaýlyǵy men quqyqtaryn qorǵaýǵa, qorshaǵan ortany lastaýdy tejeýge, taza energetıka men ónerkásipti damytýǵa, jańa tehnlogııalar men ınvestıtsııalardy tartýǵa mindettimiz. Atap aıtqanda, balalardyń taza tabıǵatta ómir súrýine jaǵdaı jasaý – barshamyzdyń mindetimiz», - dedi ol.
«Agrobank qurý kerek»
«Aýyl» halyqtyq demokratııalyq partııasy tóraǵasynyń orynbasary Jıgýlı Daırabaev elimizde otandyq aýyl sharýashylyǵy tehnıkasyn qurastyrýǵa basymdyq berý kerektigine toqtaldy.
«Aýyl» partııasy irgeli saıası uıym ekeni belgili. Qazir Parlament Májilisi depýtattaryn saılaý naýqanyna qatysyp jatyrmyz. Qatarymyzǵa eldi, jerdi súıetin naǵyz patrıot azamattar birikken», - dedi Jıgýlı Daırabaev.
Osy oraıda, ol partııada myńdaǵan adam qamtylǵanyn jáne pikirsaıysqa osy azamattardyń senimin arqalap kelgenin aıtty.
«Bizdiń partııa barlyq aýdan men qalalarda turaqty jumys istep keledi. Osy saılaýda partııa nátıjesi joǵary bolatynyna senimdimiz. Partııanyń pozıtsııasy aıqyn – qoǵamdaǵy negizgi saıası kúshke aınalý», - dedi partııa ókili.
Foto: t.me/tvkhabar24
Bul turǵyda ol «Aýyl» partııasy azyq-túlik qaýipsizdigine jáne aýyldardy damytýǵa erekshe nazar aýdaryp otyrǵanyn jetkizdi. Partııa Májiliske óken jaǵdaıda, tıisti zańdardy qabyldaýǵa úles qosyp, ádil jumys atqarýǵa daıyn.
«Halqymyz bank júıesinen de zardap shegip otyr. Sebebi, nesıeniń paıyzdyq ústemesi tym joǵary, halyq qaryzǵa ábden batqan. Sonymen qatar, áleýmettik salada qordalanǵan másele kóp. Atap aıtqanda, Májiliske ótken jaǵdaıda, azyq-túlik qaýipsizdigi týraly zańdy halyqpen aqyldasa otyryp qabyldaımyz. Aýyldyń ınfraqurylymy tozdy, sondyqtan eldi mekenderdegi jelilerdi qalpyna keltirý kerek. Salany tyǵyryqtan shyǵarý úshin 100 paıyz memlekettik kapıtalmen Agrobank qurý máselesin sheshemiz. Budan bólek, aýyl sharýashylyǵy tehnıkasyn jańartý maqsatynda otandyq tehnıkany qurastyrýǵa basymdyq beremiz», - dedi Jıgýlı Daırabaev.
«Aq jol» qııalı ýáde emes, naqty is atqarady»
«Aq jol» demokratııalyq partııasynyń tóraǵasy Azat Perýashev partııanyń Parlamenttegi basty jetistikterine toqtaldy.
«Aq jol» demokratııalyq partııasy – otandyq ónidirisshiler men ultjandy azamattardyń partııasy. Basqalar óz qııalymen ýádeni úıip-tókse, biz naqty ne istegenimizdi jáne bul jumysty ári qaraı qalaı jalǵastyratynymyz týraly aıtamyz. Bizdiń basymdyqtar, ulttyq ustanymdar – erkin ekonomıka men otandyq óndirýshilerdi qoldaý, parlamenttik respýblıka, deofshorızatsııa men kapıtaldy elge qaıtarý», - dedi Azat Perýashev.
Foto: t.me/tvkhabar24
Onyń aıtýynsha, «Aq jol» fraktsııasy Parlamenttegi jumysy kezinde zań jobalaryna 10 myńnan astam usynys, 600-den astam depýtattyq saýal joldap, 14 zań jobasynyń uıytqysy boldy.
«Bıýdjettiń atqarylýy týraly esepter, mınıstrlerdi taǵaıyndaý jáne basqa da mańyzdy máselelerdi talqylaǵanda «Aq jol» ózgeshe pikirin aıtyp, daýys bergende Úkimetti udaıy qoldamady. Parlamentte jumys istegende biz bılik tarapynan jyldar boıy kedergi qoıylyp kelgen birqatar mańyzdy bastama kóterdik. Prezıdent Qasym-Jomart Toqaevtyń tikeleı tapsyrmasymen biz 2012 jyldan bastap usynǵan «Parlamenttik oppozıtsııa týraly» zań qabyldandy, «Aq jol» partııasy 2014 jyldan beri usynyp kele jatqan «Jeke tulǵalardyń bankrottyǵy týraly» zań qabyldandy, ÓKM jáne QQT monopolııasy joıyldy, biz 2017 jyldan beri olardyń zańsyz ekenin birneshe ret kórsetken edik», - dedi partııa basshysy.
Sondaı-aq, Prezıdent 1 qyrkúıektegi joldaýynda «Aq jol» 2011 jyldan beri kótergen salyqtardyń saralanǵan mólsherlemelerin engizýdi, otandyq kásiporyndardy memlekettik satyp alýlarda qoldaýdy tapsyrdy, biz ony 2015 jyldan bastap talap etip keldik, «Kapıtaldy qaıtarý týraly» zańdy ázirleýdi «Aq jol» partııasy 2013 jyldan beri talap etip keldi jáne taǵy basqalary bar.
«2019 jyly «Aq jol» partııasy úlken ózgerister bolatynyn, biraq olardy basqarý mańyzdy ekenin aıtty. Bizdiń baǵdarlama osyndaı naqty ózgeristeri bar usynystardan turady. Biz onyń Prezıdent Toqaevtyń ustanymymen úndes ekenin kórip otyrmyz, ol jaqynda jańa reformalar paketin usynatynyn aıtty. «Aq jol» partııasy ózgerister jaı ǵana ádemi sóz emes, naqty ister bolýy úshin óz úlesin qosady», - dedi Azat Perýashev.
«Tańdaý jasaýdan jalyqpaıyq»
«Qazaqstan halyq partııasy» bolsa qarapaıym adamdardyń, onyń ishinde kóp balaly analar men balalar, jastar jáne jas otbasylardyń quqyqtaryn qorǵaýǵa asa mán bermek.
«Adamdy alǵa jeteleıtin de, ómirden túńildiretin de – senim. Eń aldymen Qudaıǵa, sosyn ózimizge senemiz. Biraq, ózgege senbeımiz, óıtkeni ony joǵaltyp aldyq. Qazaq halqy soǵysty da, ashtyqty da kórdi. Qabyrǵasy qansha qaıyssa da túńilmedi. Ózge elge ketip qalyp nemese men úshin barlyǵy sheshilip qoıǵan dep úıde otyrý qıyn emes. Men de solaı ete alar edim. Alaıda, mine saǵat 20:00-de aýyryńqyrap qalǵan bir jastan asqan balamdy tastap, halyq aldyna shyǵyp turmyn. Erikkenniń isi me? Áıel aldymen ózgeni, sosyn baryp ózin oılaıdy, ásirese ana. Mıtıngige shyǵyp júrgen ana, bala baǵyp otyrýdyń ornyna jumys istep júrgen ana. Ýaqtyly zeınetke shyǵa almaı, balasyna masyl bolyp otyrǵan ana qanshama. Óz basym ulym áskerden aman oralsyn, balalarym kúndelikti nápáqasyn oılamaı ǵalym bolsyn, elge eńbegi sińsin dep tileımin», - dedi «Qazaqstan halyq partııasynyń» múshesi Oksana Áýbákirova.
Foto: t.me/tvkhabar24
Partııa ókili 63 jasqa deıin jumys istemeı, aıaly áje bolyp, parasatty urpaq tárbıelegisi keletinin aıtty.
«Bul – meniń ǵana emes, barlyq ananyń tilegi. Biz Astananyń mańyndaǵy aýylda turamyz. Gaz joq, ol túgili sý da joq. Kúndelikti sýyn tasyp ishetin halyqtan ne suraımyz? Erekshe qajettiligi bar adamdar, sal balalar, aýtıst, olardy oılap jatqan adam bar ma? Ata-anasy bar aýrý balalar qalaı bolǵanda da qoǵamǵa qosylýǵa múmkindik alady. Al, ata-anasyz balalar dalada qalyp jatady. Mıy bolsa da, tiri ólik. Olardyń arasynda múmkin Eınshteın bar shyǵar? Aıtpaqshy, Eınshteın aýtıst bolǵan. Olardy oılaǵan el aǵasy bar ma? «Óıtemiz, búıtemiz» dep, «úıdeı báleni sheshemiz» dep, keıin halyqtyń aýzy qý shóppen súrtiledi. Búgin men úlken senimmen aldaryńyzǵa shyǵyp otyrmyn. «Oıan, qazaq» degeli 118 jyl bolypty, aıta-aıta jaýyr boldy. Óz tańdaýymyzdy jasaýdan jalyqpaıyq», - dedi ol.
«Memleket basshysy saıası reformalar josparyn jarııalady, elimizde adam quqyqtary jónindegi ýákil, Konstıtýtsııalyq sot paıda boldy. Saıası partııalardy tirkeý sharttary ózgertildi, eki jańa partııa quryldy. Partııalyq emes azamattarǵa saılanýǵa konstıtýtsııalyq quqyq qaıtaryldy, eldiń júzdegen azamattary bir mandatty okrýgter boıynsha Májilis pen máslıhattarǵa óz kandıdatýralaryn usyndy. «Qazaqstan halyq partııasy» qarapaıym adamdardyń, kóp balaly analar men balalardyń, jastar jáne jas otbasylardyń quqyqtaryn qorǵaıdy. Bul – kenshiler men metallýrgter partııasy, bizdiń artymyzda mıllıondaǵan jumysshy tur», - dep sózin tolyqtyrdy «Qazaqstan halyq partııasynyń» múshesi.
«Mádenıet turǵysynan irgeli ózgerister kerek»
Pikirsaıys barysynda «Respublica» partııasynyń tóraǵasy Aıdarbek Qojanazarov óz jumystarynyń ózegi bolatyn negizgi baǵyttardy atady.
«Búgingi tańda elimiz úlken daǵdarysta tur dep aıtqymyz keledi. Buǵan deıingi pikirtalasta partııamyzdyń teń tóraǵasy bul tarýaly jaqsy aıtty. El bıýdjetiniń shyǵys bóligi 21 trln teńge bolsa, salyq túsimderi 17 trln teńge bolyp otyr. Sonda elimizge 4 trln teńge túspeı jatyr. Qazir bankrot aldynda turǵanymyzdy, daǵdarysta ekenimizdi moıyndaýǵa bolady. Bizdiń komanda, partııanyń teń tóraǵalary – daǵdarysty eńserip úırengen menedjerler. Mysaly, Rýslan Berdenovti alsaq, «Evrofarmdy» nólden bastap kóterdi. Dınara Shúkijanovany alsaq, kereksiz etip tastaǵan dızel zaýytyn áıgili «Agromashholdıngke» aınaldyrdy. Qazir ol zaýyt túrli traktorlar men kombaındar qurastyryp otyr. Men de quldyrap bara jatqan agroholdıngti 5 jyldyń ishinde elimizdegi №1 agroholdıngke aınaldyrdym», - dedi «Respublica» partııasynyń tóraǵasy.
Foto: t.me/tvkhabar24
Onyń sózinshe, búgingi tańda bıznes-ortany jaqsartý baǵytynda óte mańyzdy ózgerister engizetin ýaqyt jetti.
«Biz áribir azamatymyz erkin bolǵanyn qalaımyz. Erkin adam degen kim? Erkindiktiń máni deniń saý, bilimiń, mádenıetiń bolǵanynda. Sondyqtan, biz óz baǵdarlamamyzda úsh negizgi bólimdi belgilep aldyq. Birinshi bólim bilim berýdi qamtıdy. Ol úshin bizge bilim berý júıesin aýylda da, qalada da ádilettilik turǵysynan teńestirý qajet. Ekinshi bólim – densaýlyq saqtaý júıesin jaqsartý. Bizge skrınıngter aıasyn keńeıtip, aýyryp em izdemeı, aldyn alatyndaı júıe engizý qajet. Aýrý tónbeı turyp, ult saýlyǵyna jumys isteýimiz qajet. Sondaı-aq, mádenıetimizdi ońdaý qajet. Ótkende birinshi televızııalyq pikirsaıysty kórdim. Bizdiń, tipti saıası deńgeıdegi mádenıetimiz osyndaı bolsa, ultymyzdyń mádenıeti týraly ne deýge bolady? Bizge mádenıet turǵysynan irgeli ózgerister kerek jáne biz mádenıet tildi damytýdan qalyptasatynyn kórip otyrmyz», - dedi Aıdarbek Qojanazarov.
«Zańsyz baılyqqa jol bermeý qajet»
«Jalpyulttyq sotsıal-demokratııalyq partııasy» prezıdenttik-parlamenttik basqarý júıesin engize otyryp, halyq parlamentin qurýdy usyndy.
«Bizdiń maqsat – halyqtyń turmystyq jaǵdaıyn jaqsartý. Sondyqtan da, biz saılaýǵa túsip jatyrmyz. Bizdiń el sotsıal-demokrattardyń ıdeıasyna muqtaj. Sondyqtan, saıası reformalardy jalǵastyrý kerek. Azamattar úshin qajetti zańdar qabyldaý qajet. Bizdiń usynystarymyz – prezıdenttik-parlamenttik basqarý júıesin engizý. Halyq parlamentin qurý. Senatty tarqatý. Jemqorlyqpen júıeli túrde kúresý. Tergeý júrgizip, elden urlanǵan jáne ofshorlarǵa jasyrylǵan qarajatty elge qaıtarý. Tabıǵı qazbalardy óńdeý jáne olardy eksporttaýdy memleket qaramaǵyna qaıtarý», - dedi «Jalpyulttyq sotsıal-demokratııalyq partııasy» Astana qalalyq fılıalynyń tóraǵasy Nurlan Áýesbaev pikirsaıys barysynda.
Vıdeodan alynǵan kadr: khabar.kz
Odan bólek, sotsıal-demokrattar ár adamǵa áleýmettik qoldaý kórsetýge ýáde berip otyr.
«Azamattardyń ómir standartyn qabyldaý qajet, ıaǵnı zertteý júrgizip, arnaıy baǵdarlama engizgen durys. Baǵdarlamada adamdardyń negizgi qajettilikteri eskeriledi. Biz úshin kelesi suraqtar mańyzdy: Tegin bilim berý jáne medıtsına. Mektepter, aýrýhanalar basqa da áleýmettik nysandar salý. Turǵyn úı baǵdarlamalaryn qaıta qarap jetildirý. Sonymen qatar, aýyldyń jaǵdaıyn jaqsartý kerek. Jemqorlyq pen olıgarhtarmen kúresti jalpy ulttyq deńgeıge kóterý. Sheneýnikterdiń mindetti túrde deklaratsııa tapsyrýy. Zańsyz baılyqqa jol bermeý. Nesıe paıyzdaryn tómendetý. Energetıka nysandaryn jáne kommýnaldyq kásiporyndardy memleket qaramaǵyna qaıtarý. Sondaı-aq, saılaýaldy baǵdarlamamyzda elden zańsyz shyǵarylǵan qarajattardy qaıtarý boıynsha vedomstvoaralyq komıssııa quramyna bizdi engizýdi talap etip otyrmyz. Bul arnaıy zańmen rettelýi qajet», - deıdi ol.
