Saıası qýǵyn-súrginge baılanysty termınder sózdigi jasalady
Bul týraly Saıası qýǵyn-súrgin qurbandaryn tolyq aqtaý jónindegi memlekettik komıssııanyń jobalyq keńse jetekshisi Sabyr Qasymov Nur-Sultan qalasyndaǵy toptyq semınarda málim etti.
«Saıası qýǵyn-súrgin qurbandaryn, kóteriliske qatysýshylardy, onyń ishinde eshbir tergeýsiz, sotsyz atylǵandardy tolyq aqtaý máselesi tyń ári kúrdeli jumys deýge bolady. Buǵan deıin kóteriliske qatysqany úshin ústinen protsessýaldyq qujattar rásimdelgenderdiń basym bóligi aqtaldy. Olar negizinen 58-bap boıynsha sottalǵan. Qalǵan sanattar boıynsha zańdyq turǵyda pysyqtap, saıası aqtaý kerek», - degen jobalyq keńse jetekshisi árbir kóterilistiń týyndaý sebebine mán berý kerektigin eskertti.
«Kóterilisterdiń neden týyndaǵanyn aıqyndaý ózekti másele bolyp tur. Adamdar sol kezdegi bıliktiń halyqqa qarsy terrory men ozbyrlyǵyn, tolassyz saıası naýqandardyń zardabyn basynan ótkizip, qarsy jappaı narazylyqtar jáne kóterilisterge shyqty. Olar ózderiniń tabıǵı áleýmettik múddesin qorǵady. Jaqyndap kele jatqan tragedııaǵa jol bermeýge tyrysty», - dedi zańger sarapshy.
Sondaı-aq, ol atalmysh kezeńdegi kóterilisterge qatysýshylardy saıası turǵydan aqtaýdyń quqyqtyq negizin qalyptastyrý boıynsha qandaı jumystar jasalǵanyna toqtaldy.
«Arhıvterde saqtalǵan qujattar, sovet ǵalymdary tarapynan jasalǵan baǵalaýlar ádette bul kóterilistiń bárin barynsha jaǵymsyz jaǵynan sıpattaǵan. Olar negizinen «bandıttik», «kontrervolıýtsııalyq», «ultshyl» kóterilister dep kórsetilgen. Qazirgi zertteýshilerdiń mindeti – solarǵa shynaıy, bolshevıktik, stalındik tapshyl dogmattardyń paıymynan azat baǵa berý. Biz halyqaralyq qundylyqtar men standarttardy negizge alamyz. Jobalyq keńse termınologııalyq sózdik jasaıdy. Ony jasaýda zertteýshilerdiń, óńirlik komıssııalardyń, jumys toptarynyń pikir-ustanymdary eskeriledi. Sizderge negizgi termınderdiń jańa túsindirmesin halyqaralyq standarttar men zamanaýı ádistemelerge sáıkes termınder sózdigin usynyp, keste túrinde anyqtamasyn berý kerek», - dedi Sabyr Qasymov.
