Saıası qýǵyn-súrgin – halqymyz úshin tarıhı tragedııa – Erkin Ábil
ASTANA. KAZINFORM – QR Prezıdenti Іs basqarmasynyń Prezıdenttik ortalyǵynda saıası qýǵyn-súrgin jáne asharshylyq qurbandaryn eske alý kúnine arnalǵan «HH ǵasyrdaǵy saıası qýǵyn-súrginder: tujyrymdamalyq paıym jáne saıası-quqyqtyq baǵa berý» atty dóńgelek ústel ótti.
QR Prezıdenttik ortalyǵynyń dırektory Baqytjan Temirbolat is-sharanyń maqsatyn atap ótti.
«Qazaqstandaǵy jáne burynǵy Keńes Odaǵy respýblıkalaryndaǵy saıası repressııalardyń ózekti máselelerine saraptamalyq taldaý jasap, saıası-quqyqtyq baǵa berý mańyzdy», - dedi ol.
Qazaqstan aýmaǵynda jalpy sany 11-ge jýyq GÝLAG lageri men bólimsheleri qurylǵany belgili. Qazaq tarıhyndaǵy asa aýyr zulmatty kezeń – asharshylyqtyń bolǵanyna ǵasyrǵa jýyq ýaqyt ótse de, onyń alǵysharttary, sebebi men saldary áli kúnge deıin ǵylymı turǵydan jan-jaqty ári tolyq zerttelip bolǵan joq. Bul rette, osydan tórt jyl buryn Memleket basshysynyń tapsyrmasymen asharshylyq pen stalındik quǵyn-súrgin qurbandaryn aqtaý jóninde memlekettik komıssııa qurylǵan bolatyn.
Májilis depýtaty, tarıh ǵylymdarynyń doktory, professor Erkin Ábil sońǵy jyldary qupııa saqtalǵan qujattar qolǵa tıgenimen, kóbi jaramsyz kúıinde ekenin aıtty. Qaǵazdarǵa sý tıip, jyrtylyp, jazýlar joǵala bastaǵan. Dese de, ǵalymdar mańyzdy dúnıelerdi barynsha saqtap qalýǵa tyrysyp otyr.
«Bul oqıǵa – halqymyz úshin tarıhı tragedııa. Áli ashylmaǵan dúnıeler kóp. Biz áli saıası qýǵyn-súrgin qurbandarynyń naqty sanyn bilmeımiz. Jeke esimderin bilý bylaı tursyn, asharshylyqtan qaıtys bolǵandardyń sany da belgisiz. Úsh jyl ishinde muraǵat materıaldary retinde 70-ten astam qujat jınaǵy ázirlendi. Sońǵy eki jylda Almatydaǵy Prezıdent muraǵatynda 100 jylda jınalǵan materıalmen teń 700 myńǵa jýyq qujat jınaldy. Alaıda, onyń jartysynan kóbi durys saqtalmaǵandyqtan, qaıta qalpyna keltirýdi qajet etedi. Keıin qujattardy ǵylymı aınalymǵa engizý kerek», - dedi Erkin Ábil.
