Saıasattanýshy Aıdos Sarym: Qordaıdaǵy qaqtyǵysty mınýtyna deıin zertteý kerek

NUR-SULTAN. QazAqparat – Belgili saıasattanýshy, Ulttyq qoǵamdyq senim keńesiniń múshesi Aıdos Sarym Qordaıdaǵy qaıǵyly oqıǵaǵa qatysty pikir bildirdi, dep habarlaıdy QazAqparat.

«Árıne bul – qaıtalanbaýy tıis óte qorqynyshty oqıǵa. Bul jaıt barlyǵyna sabaq bolýy tıis. Biz kúrdeli ýaqytta ómir súrip jatyrmyz. Bizdiń qoǵam únemi qozǵalysta jáne onda arhıtektonıkalyq ózgerister júrip jatyr. Bul álemde ózgermeıtin, turaqty eshteńe joq. Sondyqtan, ótken jyldardyń shań basqan lozýngtaryn búrkenbeı, óz elimizdi, óz qoǵamymyzdy zertteýimiz kerek», - dedi Aıdos Sarym QazAqparat tilshisine bergen suhbatynda.

Osyǵan baılanysty, ishki saıasat qurylymyn qaıta reformalap, shıelenistiń qaıdan shyqqanyn zertteý qajet.

«Biz qolda bardyń bárinen bir mezette-aq ajyrap qalýymyz múmkin ekenin, buryn jasyryp kelgen dúnıelerimizdiń báriniń bir sátte beti ashylyp, ózimiz kórgimiz kelmeıtin dúnıeniń kýási bolatynymyzdy baıqadyq.

Sondyqtan qazir mert bolǵandardy jerlep, jaralylardy emdep, eń bastysy – baıyppen oılaný qajet. Halyqtyq dıplomatııa quraldaryn ǵana emes, gýmanıtarlyq ǵylymdardy – áleýmettaný, psıhologııa, konflıktologııany qoldanyp, qaqtyǵystyń árbir mınýtyn zertteý kerek. Assambleıa ınstıtýttaryn qosa alǵanda, memlekettik organdar men ishki saıasat qurylymdaryn reformalaý qajet», - dedi A. Sarym.

Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti arandatýshylar óz paıdasyna qoldanbaq bolǵanyn málimdedi.

Oqıǵa týraly tolyq málimetti arnaıy aıdardan oqýǵa bolady.