Saıasatta eshteńeden qoryqpaý kerek dep oılaımyn - prezıdenttikke úmitker Qaraqat Ábden

ASTANA. QazAqparat – QR prezıdenttigine úmitker Qaraqat Ábden Ortalyq saılaý komıssııasynyń qaraýyna kandıdat retinde qujattaryn tapsyryp bolǵannan keıin jýrnalısterdiń suraqtaryna jaýap berdi, dep habarlaıdy QazAqparat tilshisi.

«Osy minberdi paıdalanyp meniń kandıdatýramdy usynǵan «Kásibı áleýmettik jumyskerler Ulttyq alıansy» respýblıkalyq qoǵamdyq birlestigine bildirgen senimi úshin úlken alǵys aıtqym keledi. Bul men úshin úlken abyroı, sonymen birge, úlken jaýapkershilik.

Men ol adamdardyń úmitin aqtaýǵa barymdy salamyn», - dedi úmitker.

BAQ ókilderi Q.Ábdennen kezekten tys prezıdent saılaýyna qatysý týraly sheshimdi qalaı jáne kimniń bastamasymen qabyldaǵanyn surady.

«Bul – meniń jeke qabyldaǵan sheshimim. Eshkimniń tapsyrmasy nemese keńesi emes», - degen Qaraqat Ábden ázirge prezıdenttike úmitkerlerdiń ishinde jalǵyz áıel adam bolsa da, boıynda eshqandaı qorqynysh joq ekenin jetkizdi.

«Saıasatta eshteńeden qoryqpaý kerek dep oılaımyn. Árqashan daıyn bolý kerek», - dedi ol.

Eske salaıyq, Astana qoǵamdyq keńesiniń múshesi, máslıhat depýtaty Qaraqat Ábden prezıdenttike úmitker retinde Ortalyq saılaý komıssııasyna qujattaryn búgin tapsyrǵan bolatyn.

Sondaı-aq búgin OSK halyq koalıtsııasy usynǵan Qasym-Jomart Toqaevtyń QR prezıdenttigine kandıdatýrasyn barlyq talaptarǵa saı dep sheshti.

Budan bólek, «Amanat» Qazaqstan kásipodaqtar dostastyǵy» respýblıkalyq birlestigi usynǵan Meıram Qajykenniń kandıdatýrasy talaptarǵa saı degen qorytyndy jasaldy.