Saıasatkerge jasalǵan qastandyq: Donald Tramp Charlı Kırktiń qaza tapqanyn habarlady

ASTANA. KAZINFORM – AQSh-taǵy ıÝta shtatynda sóz sóılep turǵan sátinde oqqa ushqan saıasatker ári Tramptyń jaqtasy Charlı Kırk qaza tapty. Bul týraly prezıdent Donald Tramp málimdedi, dep jazdy BBC.

Eske sala keteıik, Charlı Kırkke Utah Valley ýnıversıtetiniń kampýsynda qastandyq jasalǵan bolatyn. Ol moınynan jaraqat alyp, aýyr halde aýrýhanaǵa jetkizilgen edi.

AQSh Prezıdenti Donald Tramp óziniń Truth Social jelisindegi paraqshasynda bylaı dep jazdy: «Uly ári ańyzǵa aınalǵan Charlı Kırk endi joq. AQSh-ta jastardy odan artyq túsinip, qoldaǵan jan bolǵan emes. Ony barlyǵy jaqsy kórdi, oǵan tánti boldy, ásirese men. Endi ol aramyzda joq. Melanııa ekeýmiz jubaıy Erıkaǵa jáne otbasyna qaıǵyryp kóńil aıtamyz. Charlı, biz seni jaqsy kóremiz!».

31 jastaǵy Charlı Kırk – tanymal podkast júrgizýshi ári Donald Tramptyń belsendi qoldaýshysy edi. Ol mektepter men ýnıversıtetterde konservatıvtik qundylyqtardy nasıhattaý maqsatynda Turning Point USA stýdenttik qozǵalysyn qurǵan.

Aqparattarǵa sáıkes, Kırkke shamamen 200 metr qashyqtyqtan oq atylǵan. Aldymen jergilikti bılik kúdiktiniń ustalǵanyn habarlaǵanymen, keıinnen oq atqan adamnyń qolǵa túspegeni belgili boldy.