Saıahattaý eshqashan kesh emes: 73 jastaǵy aqsaqal álem elderin jaıaý aralaýǵa Atyraýdan jolǵa shyqty

ATYRAÝ. QazAqparat – Ulytaý oblysynyń turǵyny, 73 jastaǵy saıahatshy Sársenbaı Qotyrashov álem elderin jaıaý aralaý úshin Atyraýdan jolǵa shyqty. Onyń sapary eki jylǵa sozylady, dep habarlaıdy QazAqparat tilshisi.

Jahan elderine jaıaý attanǵaly otyrǵan saıahatshy Sársenbaı Qotyrashovtyń sapary búgin, 2 tamyzda bastaldy.

Ol jaıaý saparynyń aldynda atyraýlyq jastarmen kezdesti.

«Meniń jaıaý saparym álemniń birneshe elin qamtıdy. Qazaqstannan jolǵa shyǵyp, Reseı, Grýzııa, Túrkııa, Bolgarııa, Serbııa, Vengrııa, Avstrııa, Germanııa, Frantsııa, AQSh, Qytaı, Mońǵolııa elderine baramyn. Keıin Reseı arqyly Qazaqstanǵa oralýdy kózdep otyrmyn. Jaıaý saparym 2 jylǵa sozylyp, 2025 jyldyń tamyzynda aıaqtaımyn degen josparym bar», -deıdi Sársenbaı Qotyrashov.

Ol jaıaý saparyn birneshe baǵytqa bólgen.

Alǵashqy marshrýty – Qazaqstan, Reseı, Grýzııa, Túrkııa elderine barý. Bul elderdi aralaý úshin 3 myń shaqyrymǵa jýyq jol júredi. Buǵan 100 kún qajet.

Ekinshi baǵyttaǵy Túrkııa, Frantsııa, AQSh elderin 180 kúnde aralaýdy josparlap otyr. Bul úshin 9 myń shaqyrymnan astam joldy eńsermek.

Úshinshi kezeńe AQSh-tan bastap, Qytaı, Mońǵolııa, Reseı arqyly Qazaqstanǵa oralady. Bul kezeńde 130 kúnde 4 myń shaqyrymnan astam jol júredi.

«Meniń ustanymym – saıahattaý eshqashan kesh emes. Álem elderin jaıaý aralaǵan qazaq qarııasynyń atyn Gınnestiń rekordtar kitabyna tirkep, álemdik rekord ornatsam deımin. Eń bastysy, beıbitshilikti nasıhattap, jahan elderin yntymaqqa shaqyrǵym keledi. Men bul saparǵa tastúıin daıynmyn. Byltyrǵy elimizdiń óńirlerin jaıaý aralaǵan saparym men úshin ári synaq, ári daıyndyq boldy. Jasymnyń ulǵaıǵanyna qaramastan kez kelgen qıyndyqty jeńýge bekinip otyrmyn. Al, bul jolǵy jaıaý saıahatym – óte jaýapty sapar. Sol sebepten, álem elderine saıahatymdy sátti ótkizý úshin kúnine 30-40 shaqyrymdaı jaıaý júremin», -dedi Sársenbaı Qotyrashev.

Osylaısha, álemdi jaıaý aralaýdy kózdegen qazaq qarııasy úsh jylda 16 210 shaqyrym jol júredi.

Jıhankezdiń dorbasynda eń qajetti zattary bar. Bul – gıgıenalyq zattar, kıim, aıaq kıim men azyq-túlik.

Eske sala ketelik, buǵan deıin 73 jastaǵy ulytaýlyq qarııa álem boıynsha jaıaý marafonǵa attanatyny habarlanǵan edi.