Saıabaqtar, skverler men jaǵalaýlar: bıyl Almaty qalaı túrlenedi
ALMATY. KAZINFORM – Almaty qalasynyń qoǵamdyq keńistikterdi damytý basqarmasynan Kazinform saýalyna joldaǵan jaýapta bıyl shaharda saıabaqtardy, skverlerdi jáne jaǵalaýlardy abattandyrý jumystary jalǵasatynyn aıtty.
Negizgi jobalar qatarynda – burynǵy Prezıdent rezıdentsııasy ornyna skver salý, Baým toǵaıyn qalpyna keltirý, sondaı-aq Kishi Almaty ózeniniń jaǵalaýyn abattandyrý bar.
Qazir Almatyda 12 saıabaq, 141 skver, 31 jaıaý júrginshiler aımaǵy, 21 býlvar, 326 jasyl jelek jáne 11 jaǵalaý tirkelgen. Jasyl aýmaqtardyń jalpy aýdany 977 gektar.
2025 jylǵa qandaı jobalar júzege asady
Basqarmadan atap ótkendeı, Almatyda qoǵamdyq keńistikterdi damytý jáne qalany kógaldandyrý boıynsha aýqymdy baǵdarlama bar.
Bıyl kelesi saıabaqtar men qoǵamdyq keńistikterdi jańartý kózdelgen:
1. Prezıdenttiń qyzmettik rezıdentsııasynyń ornynda saıabaq salý.
Qujattarda bul joba «Nazarbaev dańǵylynyń batysyndaǵy jáne Gandı kóshesiniń soltústigindegi skver aýmaǵyn qaıta qurý» dep atalady.
Ákimdikte naqtylaǵandaı, jergilikti bıýdjetten ınjenerlik kommýnıkatsııalardy iske asyrýǵa 940 mln teńge qarastyrylǵan, al qurylys-montaj jumystary demeýshilik qarajat esebinen qarjylandyrylady.
Memlekettik satyp alý portalyndaǵy tehnıkalyq qadaǵalaý týraly habarlamaǵa sáıkes, Prezıdent rezıdentsııasy ornyndaǵy skverdiń astynda jerasty avtoturaǵy salynady.
Buǵan deıin ákimdik bul aýmaqqa bıiktigi alty metrden asatyn 50 iri aǵash otyrǵyzylǵanyn málimdegen edi. Qazir ınjenerlik jeliler tartylyp, sýarý júıesine arnalǵan rezervýar qurylysy júrgizilip jatyr.
Bul joba — qalalyq ortany jaqsartý jáne almatylyqtar úshin jańa tartymdy aımaqtar qurýǵa baǵyttalǵan keń aýqymdy jospardyń bir bóligi.
2. Almatydaǵy Baým toǵaıy abattandyrylady
Qalanyń basty tabıǵı nysandarynyń biri – Baým toǵaıy. Bul jumystarǵa 3,3 mlrd teńge bólingen.
Toǵaıdyń aýdany 137,7 gektar, ol Túrksib aýdanynda Seıfýllın men Súıinbaı dańǵyldarynyń arasynda ornalasqan.
Buǵan deıin habarlaǵandaı, jobanyń maqsaty - toǵaıdy ekologııalyq mańyzy bar aýmaq retinde jańǵyrtý, turǵyndar arasynda ekologııalyq sanany dáripteý. Tásildiń ereksheligi-toǵaıdyń tabıǵı komponentine mınımaldy aralasý. Aýmaqta shaǵyn arhıtektýralyq formalar paıda bolady: oryndyqtar, qoqys jáshikteri, sondaı-aq balalar oıyndary men sportqa arnalǵan jabdyqtar.
Baým toǵaıy úsh aımaqqa bólinedi:
– Belsendi aımaq-ashyq ınfraqurylymǵa qoljetimdilikti qamtamasyz etý úshin toǵaıdyń perımetri boıynsha ornalasady;
– Rekreatsııalyq aımaq-eń az ınfraqurylymy bar tynysh demalys orny bolady;
– Eko-aımaq shekteýli aralasýmen tabıǵı flora men faýnany saqtaýǵa jáne qalpyna keltirýge arnalǵan.
3. Almaty qalasyndaǵy «Ońtústik» saıabaǵynyń soltústigine jasyl aımaq salýǵa 992 mln teńge bólingen.
4. Baıtýrsynov pen Sátpaev kósheleriniń qıylysynda ornalasqan Geologtar alleıasy kúrdeli jóndeýden ótedi. Oǵan 867 mln teńge qarastyrylǵan.
5. Qoǵamdyq keńistikterdi damytý basqarmasynyń málimetinshe, «Atakent» qazaqstandyq iskerlik yntymaqtastyq ortalyǵy aýmaǵyn qaıta jańǵyrtý jobasyna 5 mlrd teńge qarastyrylǵan.
6. Raıymbek dańǵylynan bastap Gogol kóshesine deıingi Pýshkın kóshesin keshendi abattandyrýǵa 2,216 mlrd teńge bólinip otyr.
7. Dostyq dańǵylyn jańartýǵa 1,445 mlrd teńge qarastyrylǵan.
– Sonymen qatar, qazir Kishi Almaty ózeniniń jaǵalaýyn abattandyrý kózdelip otyr. Bul jumys sý bólgishten bastap taý bókterindegi «Medeý» sport keshenine deıingi aralyqty qamtıdy, – delingen ákimdiktiń resmı jaýabynda.
Qoǵamdyq keńistikterdi damytý basqarmasy barlyq jobada avtomattandyrylǵan sýarý júıeleri engizilgenin naqtylady.
Qalaǵa qansha aǵash otyrǵyzyldy
Almaty ákimdiginen málim etkendeı, qalalyq ortany kógaldandyrý boıynsha aýqymdy baǵdarlama iske asyp jatyr. Jyl basynan beri megapolıste bıiktigi 6 metrden asatyn 2 myń iri aǵash otyrǵyzyldy.
Sondaı-aq, bıiktigi 2,5 metr 20 myńǵa jýyq kóshet jáne 10 myńnan astam buta otyrǵyzyldy. Kúzde bıiktigi 4-ten 6 metrge deıin taǵy 4 myń iri aǵash otyrǵyzý josparda.
Sońǵy eki jylda Almatyda 1 mln-nan astam aǵash pen buta otyrǵyzyldy.
Memleket basshysynyń Almatyny «jasyl qala» retinde qaıta jańǵyrtý jónindegi tapsyrmasyn oryndaý aıasynda megapolısti aýqymdy kógaldandyrý baǵdarlamasy qarqyndy júzege asyrylyp jatyr.
Negizgi bastamalardyń biri – 2022 jyly bekitilgen «Jasyl Almaty» jol kartasy. Baǵdarlamanyń basty maqsaty – 2030 jylǵa deıin 2,5 mln jasyl jelek otyrǵyzý. Jyl saıyn 320 myń aǵash pen buta otyrǵyzý kózdelgen.
2030 jylǵa deıin shamamen 1,3 mln aǵash otyrǵyzylady.
Bas josparǵa sáıkes, 2030 jylǵa qaraı jasyl aımaqtardyń jalpy aýdany shamamen úsh esege - 1,3 myń gektardan 3,3 myń gektarǵa deıin ulǵaıady, al 2040 jylǵa qaraı ol 3840 gektarǵa jetedi.
Buǵan deıin Qasym-Jomart Toqaev Almatyda 2030 jylǵa deıin 2,5 mıllıon aǵash otyrǵyzý kerektigin aıtqan bolatyn. Eń bastysy, abattandyrý jumystary sýarmaly sýdyń qoljetimdiligi men qala josparyn eskere otyryp, mazmundy ári birkelki júrgizilýi kerek.
Sondaı-aq Erbolat Dosaev Almatynyń ekologııa máselesi qalaı sheshiletini týraly aıtqan bolatyn.
Almatyda aýa sapasyn lastaıtyn basty faktorlar týraly da jazǵanbyz.