Saýsaq izin tapsyrýdan bas tartqan sheteldikter elden qýylady
PAVLODAR. KAZINFORM - Daktıloskopııalyq tirkeý tek sheteldik azamattar úshin mindetti. Odan bas tartqandar el aýmaǵynan májbúrli túrde shyǵarylady.
Oblystyq polıtsııa departamentinen habarlaǵandaı, el aýmaǵynda ýaqytsha, turaqty turýǵa ruqsat nemese vıza alý úshin júgingen sheteldikter men azamattyǵy joq adamdardy mindetti daktotirkeý 1 qańtardan bastap júzege asyp jatyr.
Jyl basynan beri Pavlodar óńirinde mundaı tirkeýden 1591 sheteldik ótken.
«Daktotirkeýden ótý úshin azamattar kóshi-qon qyzmetine júginýi kerek. Kóshi-qon qyzmetiniń árbir bólimshesinde arnaıy jabdyqtar qoıylǵan. Qyzmet alýshy tulǵalar belgilengen nusqaýlyqqa sáıkes saýsaq izin qaldyrady. Daktıloskopııadan ótken soń azamatqa anyqtama beriledi, ony ári qaraı qujat rásimdegende halyqqa qyzmet kórsetý ortalyǵyna nemese aýmaqtyq kóshi-qon qyzmetterine usyna alady» dep túsindirdi polıtsııa departamentinen.
Saýsaq izin qaldyrýdan bas tartqan jaǵdaıda sheteldik azamattar elden shyǵarylady.
