Saýsaq izin alý áli engizilgen joq – ІІM
Qazaqstandyqtar saýsaq izin ázir tapsyrmaıdy, dep habarlaıdy Kazinform QR Іshki ister mınıstrligine silteme jasap.
«Daktıloskopııalyq jáne genomdyq tirkeý týraly» Zań áli qoldanysqa engizilgen joq. Májilistiń bir top depýtattyń bastamasymen atalǵan Zańǵa elimizdiń azamattaryn daktılaskopııalyq jáne genomdyq tirkeýden erikti túrde ótkizýdi kózdeıtin ózgerister men tolyqtyrýlar engizý usynyldy. Bul ózgerister men tolyqtyrýlardy 2023 jylǵy 21 jeltoqsan kúni Parlament Senaty maquldady», - delingen Kazinform agenttiginiń Іshki ister mınıstrligine joldaǵan saýal jaýabynda.
Eske salsaq, bıyl qyrkúıekte Іshki ister mınıstrligi 2024 jyldyń 1 qańtarynan bastap pasport pen jeke kýálikti rásimdeý kezinde azamattardan saýsaq izi alynatyny týraly habarlaǵan edi.
Keıin atalǵan vedomsto azamattardan saýsaq izin tapsyrý erikti bolatynyn jetkizdi.
Araǵa ýaqyt salyp Májilis saýsaq izin tapsyrý mindeti týraly bastamany zańnan alyp tastady.
