Sáýir aıynda Qytaıda eksport 8 paıyzǵa ósken

ASTANA. KAZINFORM – Juma kúni Qytaı úkimeti sáýir aıyndaǵy eksport kólemi byltyrǵy sáıkes kezeńmen salystyrǵanda 8,1%-ǵa artqanyn málimdedi. Bul kórsetkish sarapshylardyń boljaýynan tórt ese joǵary,-dep habarlaıdy RFI. 

Resmı statıstıka kórsetkendeı, Beıjiń men Vashıngton arasyndaǵy saýda qaqtyǵysynyń ýshyǵýyna baılanysty, sáýir aıynda Qytaıdyń AQSh-qa eksporty naýryz aıymen salystyrǵanda 17,6%-ǵa azaıǵan.

Qytaıdyń Bas keden basqarmasynyń málimeti boıynsha, sáýir aıynda AQSh-qa eksport kólemi 330 mıllıard dollar bolǵan, al naýryz aıynda bul kórsetkish 401 mıllıard dollar bolatyn.

Shanhaıdaǵy Baoyin Asset Management Co., Ltd. kompanııasynyń prezıdenti Chjan Chjııýeıdiń aıtýynsha, AQSh engizgen tarıfterdiń saldary sáýir aıynyń saýda derekterinen kórinis taýyp úlgermegen. Onyń pikirinshe, buǵan taýarlardyń basqa elder arqyly qaıta jóneltilýi jáne tarıfter engizilgenge deıin jasalǵan kelisimsharttar sebep bolýy múmkin. Sonymen qatar ol kelesi aılarda saýda kórsetkishteriniń tómendeı bastaıtynyn boljaıdy..

Sáýir aıynda Qytaıdyń ımport kólemi nebári 0,2%-ǵa tómendegen. Al sarapshylar 6%-ǵa qysqarady dep boljaǵan edi. Import – ishki tutynýshylyq suranystyń negizgi kórsetkishteriniń biri, sondyqtan tıisti derekter únemi jiti baqylanady.

Sonymen qatar, tutynýshylyq belsendiliktiń álsireýine jáne AQSh-pen saýda qaqtyǵysynyń órshýine baılanysty qaljyraǵan ekonomıkaǵa qoldaý kórsetý úshin, Qytaı Halyq bankiniń tóraǵasy Pan Gýnshen 7 sáýir kúni mindetti rezervtik mólsherlemeniń 0,5 paıyzdyq pýnktke tómendetilgenin málimdedi. Bul qadam – bankterdi nesıe berýge yntalandyrýǵa baǵyttalǵan. Sondaı-aq, ol turǵyn úı satyp alý úshin 5 jyldan uzaq merzimge beriletin ıpotekalyq nesıeniń paıyzdyq mólsherlemesiniń 2,85%-dan 2,6%-ǵa tómendeıtinin aıtty.

RFI-dyń atap kórsetýinshe, bul Qytaı úkimetiniń ekonomıkany yntalandyrý maqsatynda ótken jyldyń qyrkúıek aıynan beri qoldanǵan eń mańyzdy sharalarynyń biri.

RFI-dyń jazýynsha, AQSh pen Qytaıdyń joǵary laýazymdy tulǵalary Shveıtsarııada kelissóz júrgizýge daıyndalyp jatqanda, Tramp ákimshiligi Qytaıdan ákelinetin taýarlarǵa salynǵan 145% baj salyǵyn 50%–54%-ǵa deıin qysqartýdy qarastyryp otyrǵan kórinedi. Bul sheshim aldaǵy aptada kúshine enýi múmkin.

Buǵan deıin sáýir aıyndaǵy resmı málimetterge sáıkes Qytaı porttarynan shet elderge jóneltilgen taýardyń naqty kólemi ózgerissiz qalyp otyrǵanyn habarlaǵan edik.