Sáýlet Sahıev: Aýyl ákimin saılaý - elimizdegi mańyzdy oqıǵanyń biri

QYZYLORDA. QazAqparat - Aýyl ákimderin saılaý - el ómirindegi mańyzdy oqıǵanyń biri. Ol sol qyzmetke kelgen árbir azamattan demokratııany, ashyqtyqty, jaýapkershilikti talap etedi.Saıası ǵylymdar kandıdaty Sáýlet Sahıev osyndaı pikir bildirdi, dep habarlaıdy QazAqparat tilshisi.

«Elimizde búginge deıin kóptegen saıası mańyzdy is-sharalar atqaryldy. Aýyl ákimderin saılaý sol irgeli isterdiń laıyqty jalǵasy ispettes. Jergilikti halyqtyń ózin-ózi basqarý úrdisine oń yqpalyn tıgizetin aýqymdy jumys aldaǵy ýaqytta úlken paıdasyn tıgizedi degen oıdamyn. Elimizde turatyn halyqtyń 40 paıyzdan astamy aýyldyq jerdi meken etedi. Bul kórsetkish Qyzylorda oblysynda 50 paıyzdan asady. Osyǵan oraı aýyl ákimderin saılaý mańyzdy oqıǵa dep atap ótsek te artyq emes. Soǵan kóz júgirte otyryp atalǵan saıası sharanyń azamattar men memlekettiń, bılik pen qoǵamnyń arasyndaǵy qarym-qatynastyń jańa prıntsıpteriniń ornyǵýyna yqpaly zor bolmaq», - deıdi S. Sahıev.

Onyń aıtýynsha, jańa reformanyń qoǵam ómirinde alatyn orny zor. Qazir aýyl ákimdigine arnalǵan bıýdjet qarastyrylǵan. Ol jergilikti jerdegi keıbir túıtkilderdi sheshý máselesine óz septigin tıgizip otyr.

«Ras, búginde aýyldyq jerlerde birqatar problemalar júıeli sheshilip keledi. Elimizdiń barlyq óńirinde áleýmettik sala boıynsha mektep, aýrýhana, klýb sekildi áleýmettik saladaǵy jańa ǵımarattar boı kóterdi. Kóptegen aýyldarǵa gaz, sý sekildi qajettilikter tartylyp, jaryq máselesi túbegeıli sheshimin taba bastady. Al qalǵan problemalar boıynsha qazir aýyl ákimdiginiń quzyryna berilgen derbes bıýdjet arqyly sheshýge tolyq negiz bar. Endigi kezekte aýyl ákimin saılaý arqyly bılik pen buqaranyń arasy jaqyndap, eldegiler derbes bıýdjet arqyly ortaq sheshimder qabyldaýǵa negiz qalaıdy», - degen pikirde ǵalym.

Árıne, aýyl ákimin saılaý tusynda jurtshylyq tanystyqqa, rýshyldyqqa, aǵaıyndyqqa salynbaýy tıis. Halyqtyń tańdaýy demokratııa úrdisinde jalǵasýy qajet.

«Saılaýǵa túsken árbir azamattyń iskerligi, belsendiligi, jaýapkershiligi basty orynda bolǵany talap etiledi. Bul árbir aýyldyń zamanǵa saı damýyna negiz qalaıdy. Qysqasy, endigi kezekte ákimder jergilikti jerdegi sýmen jabdyqtaý, joldardy kútip ustaý, abattandyrý syndy máselelerge óz deńgeıinde kóńil bóledi. Osyndaı ómirlik mańyzdy bar máselelerdi sheshý olardyń bedeli men abyroıyn kóteredi. Olardyń jaýapkershiligi artyp, aýyl turmysyn jaqsartýǵa degen yntasy oıanady», - dep atap ótti S.Sahıev.