Sáýir aıynda tólem kartochkalarymen júrgizilgen operatsııalar sany qysqardy
2020 jyldyń qańtar-sáýir aıy aralyǵynda tólem kartochkalaryn paıdalanýshylar 12,3 trln teńge somasyna 714,6 mln operatsııa júrgizdi. Bul ótken jyldyń sáıkes kezeńimen salystyrǵanda somasy boıynsha 53%-ǵa, al sany jaǵynan 72%-ǵa artyq.
«Qolma-qol aqshasyz júrgizilgen operatsııalardyń jalpy kórsetkishtegi bóligi 2019 jyldyń sáıkes kezeńindegi 39%-dan 62%-ǵa deıin ulǵaıǵan. Alaıda, aǵymdaǵy jyldyń sáýir aıynda naýryz aıymen salystyrǵanda tólem kartochkalary arqyly júrgizilgen operatsııalar kóleminiń 21%-ǵa azaıýy baıqaldy. Qolma-qol aqshasyz júrgizilgen operatsııalar 18%-ǵa, al qolma-qol aqsha sheshý operatsııalarynyń kólemi 25%-ǵa qysqarǵan. Bul eldegi karantın sharasyna baılanysty bolyp otyr», – dep habarlady Ulttyq bank.
2020 jyldyń qańtar-sáýir aılary aralyǵyndaǵy qolma-qol aqshasyz operatsııalar kólemi men sany - 7,6 mlrd. teńge somasyna 615,3 mln. tranzaktsııany qurady.
«Ótken jyldyń osyndaı ýaqyty aralyǵynda budan eki ese az operatsııa júrgizilgen bolatyn. Negizinen qolma-qol aqshasyz operatsııalar onlaın kanaldar boıynsha jasalǵan: bankterdiń onlaın júıeleri arqyly kúnine ortasha eseppen 48,7 mlrd teńge somasyna 2,6 mln operatsııa júrgizilgen. Tólem kartochkalaryn ustaýshylar kúnine ortasha eseppen 5,1 mln qolma-qol aqshasyz jáne 827 myń qolma-qol aqsha sheshý operatsııalaryn ótkizgen. Bir qolma-qol aqshasyz operatsııanyń ortasha somasy 12 298 teńgeni qurasa, qolma-qol aqsha sheshý operatsııalarynyń ortasha somasy 47 598 teńgeni quraǵan»,– dep atap ótti banktegiler.
