Sáýir aıynda Qazaqstanda ne qymbattady
Sáýirde tutyný baǵalarynyń ındeksi aılyq mánde 0,9% qurady, tıisinshe kórsetkish naýryz deńgeıinde saqtaldy. Indeks qurylymynda azyq-túlikke jatpaıtyn taýarlar – 1,3%, azyq-túlik taýarlary – 0,9%, aqyly qyzmetter 0,4% qymbattady.
Azyq-túlikke jatpaıtyn taýarlardyń ishinde sáýirde baǵanyń eń joǵary ósimi dızel otynyna 16,1%, benzınge 9,7% tirkeldi. Naýryz aıymen salystyrǵanda jýý jáne tazalaý quraldarynyń quny 1,4%, jeke gıgıena quraldary 1,1%, ydys-aıaq 1%, turmystyq tehnıka 0,9% ósken.
Azyq-túlik taýarlary arasynda jemis pen kókónis edáýir qymbattaǵan – qyryqqabat 4,7%, qyzanaq 4,1%, júzim 3%, alma 2,6%, almurt 2,4% qymbattaǵan. Baǵanyń ósýi kúrishke – 2,7%, salqyndatylǵan sýsyndarǵa – 2,5%, rojkılerge, ýltrapasterlengen sútke – árqaısysy 2,4%-ǵa, salqyndatylǵan balyqqa – 2,2%, pasterlengen sút, makaron ónimderine – árqaısysy 2,1%-ǵa baıqaldy. Bul rette qııar – 11,4%, qaraqumyq jarmasy – 3,7%, kúnbaǵys maıy 2,6% arzandady.
Qyzmet kórsetý boıynsha baǵalardyń ósýi jolaýshylar áýe kóliginde baıqaldy, bir aıdyń ishinde ushý qyzmeti 17,7% qymbattady. Shashtaraz ben sulýlyq salondarynyń aqysy – 1,5%, jerleý qyzmetteri – 1% artty. Sanatorıı qyzmetteri – 1,1%, densaýlyq saqtaý qyzmetteri 0,9% qymbattaǵan.
Óńirler arasynda eń joǵary aılyq ınflıatsııa Abaı jáne Ulytaý oblystarynda – árqaısysynda 1,4%-ǵa (ortasha respýblıkalyq deńgeıden 0,5 p.t. joǵary), eń tómengi Astana qalasynda tirkeldi – 0,5%.
Óńirler boıynsha azyq-túlik taýarlary baǵasynyń eń joǵary ósimi: Batys Qazaqstan oblysynda – 1,8%, azyq-túlikke jatpaıtyn taýarlar boıynsha Almaty oblysynda – 3%, aqyly qyzmetterde Túrkistan oblysynda – 2,3%.
Jyldyq mánde ınflıatsııa deńgeıi qatarynan ekinshi aı baıalaýp keledi: 2023 jylǵy sáýirde – 16,8%, 2023 jylǵy naýryzda – 18,1%, 2023 jylǵy aqpanda – 21,3%. Jyldyq mánde azyq-túlik taýarlarynyń baǵasy 17,9%, azyq-túlikke jatpaıtyn taýarlar 18,2%, aqyly qyzmetter 13,7% ósti.
2022 jylǵy sáýirmen salystyrǵanda keńse taýarlary – 68,5%, kir sabyn – 59,3%, shaqpaq qant – 51,7%, ydysty jýýǵa arnalǵan quraldar – 51,6%, qııar – 50,9%, balalar sabyny – 49,6%, kúrish – 43,9%, kir jýý untaǵy – 43%, dárethana qaǵazy 42,7% qymbattady. Jyldyq mánde, kerisinshe, qyryqqabat – 53,4%, sábiz 19,2% arzandady.
«Inflıatsııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Tutyný baǵalarynyń ındeksin esepteý kezinde paıdalanylatyn taýarlar men qyzmetter sebeti 508 taýar men qyzmetten turady, munda: 160 – azyq-túlik taýarlary, 243 – azyq-túlikke jatpaıtyn taýar jáne 105 – aqyly qyzmetter. Baǵalardy tirkeý barlyq oblys ortalyǵynda, astanada jáne qalalar men aýdan ortalyqtarynda ártúrli menshik nysanyndaǵy saýda jáne qyzmet kórsetý kásiporyndarynyń iriktemeli jelisi boıynsha júrgiziledi», – dep túsindirdi Bıýronyń baǵa statıstıkasy departamentiniń dırektory Qýanyshbek Jaqypbekuly.
2023 jylǵy qańtardan bastap, tutyný baǵalarynyń ındeksin eseptegende azyq–túlik taýarlarynyń úlesi – 41,8%, azyq-túlikke jatpaıtyn taýarlar – 29,6%, aqyly qyzmetter 28,6% quraıdy.
