Saýda saıasatynda tyń ári batyl tásilder qajet – Oljas Bektenov
ASTANA. KAZINFORM – Búgin Úkimet otyrysynda QR Premer-Mınıstri Oljas Bektenov mınıstrlikke Shyńjań-Uıǵyr avtonomııalyq aýdanynda saýda ókildigin ashýǵa tolyq ázirlikti qamtamasyz etýdi tapsyrdy.
«Qazaqstan Ortalyq Azııa elderine azyq-túlik ónimderin tabysty eksporttap otyr. Al metallýrgııa óndirisiniń taýarlaryn taıaý kórshilerimizge, Eýropaǵa da, basqa elderge de jiberemiz. Otandyq ónimdi ótkizý naryǵyn keńeıtý qajet. Ol úshin shetelde eksportty barynsha tıimdi usyna bilýimiz kerek. Osy máselege baılanysty keıbir seriktes elderge saýda ókilderi jiberilýde. Alaıda bul jumys baıaý júrip jatyr jáne ony barynsha kúsheıtý qajet. Mysaly, ótken aptada Qytaı Halyq Respýblıkasy Memlekettik keńesi Premeriniń orynbasary ekeýimiz Qytaımen saýda qatynastaryn keńeıtý máselelerin jan-jaqty talqyladyq. Bul baǵyttyń perspektıvasy joǵary. Osyǵan baılanysty Saýda, Syrtqy ister jáne Qarjy mınıstrlikterine 1-shi shildege deıin Beıjińge saýda ókilderin jiberýdi jáne Shyńjań-Uıǵyr avtonomııalyq aýdanynda saýda ókildigin ashýǵa tolyq ázirlikti qamtamasyz etýdi tapsyramyn», - dedi O. Bektenov.
Onyń aıtýynsha, ortasha jáne joǵary deńgeıde óńdelgen taýarlar eksportyn qoldaýǵa basa nazar aýdarý qajet. Ol úshin eksportty qoldaýdyń qoldanystaǵy baǵdarlamalaryn kúsheıtýdiń, ınnovatsııalardy yntalandyrý men óndiristerdi keńeıtýdiń mańyzy zor. Munda otandyq taýar óndirýshilerdi qoldaý sharalarynyń róli mańyzdy bolýǵa tıis jáne bul sharalar qazir pysyqtalyp jatyr.
«Jalpy bizge saýda saıasatynda tyń ári batyl tásilder qajet. Osyǵan baılanysty Saýda jáne ıntegratsııa mınıstrligine mynadaı tapsyrmalar beremin. Birinshiden, Syrtqy ister jáne Ónerkásip mınıstrlikterimen, sondaı-aq basqa da múddeli memlekettik organdarmen jáne uıymdarmen birge 1 aı merzimde qazaqstandyq taýarlar eksportynyń naryqtaryn ártaraptandyrý máselesin pysyqtasyn, al bıylǵy 1-shi tamyzǵa qaraı shıkizattyq emes eksport kólemin odan ári ulǵaıtý jónindegi naqty is-qımyl josparyn engizsin. Ekinshiden, Syrtqy ister mınıstrligimen jáne salalyq mınıstrliktermen birge eksportqa baǵdarlanǵan elderde ımporttaýshylarǵa qoıylatyn talaptarǵa udaıy monıtorıng júrgizip, óz kásipkerlerimizdi júıeli túrde ýaqtyly habardar etip turý qajet. Sonda bizdiń óndirýshiler sheteldik naryqtardyń kez kelgen talaptaryna jedel jaýap bere alatyn boldy», - dedi Premer-Mınıstr.
Munymen qosa Úkimet basshysy eksporttaýshylar úshin kedergilerdi azaıtýdy, ásirese el ishinde jáne shetelderde ákimshilik ári kedendik rásimderdi ońaılatý men tsıfrlandyrý boıynsha turaqty jumysty atqarýdy tapsyrdy. Bul jumysqa ortalyq jáne jergilikti memlekettik organdar ǵana emes, shetelderdegi elshilikter men ókildikter de tolyq kólemde atsalysýy tıis.
«Kólik mınıstrligi shıkizattyq emes taýarlardy tıimdi eksporttaý úshin qajet kólik-logıstıkalyq ınfraqurylymdy odan ári jetildirýi qajet», - dedi O. Bektenov.
