Saýda ortalyqtaryn salatyn kompanııalardyń 12%-ǵa jýyq shyǵynyn memleket sýbsıdııalamaq

ASTANA. QazAqparat – Saýda ortalyqtarynyń qurylysymen aınalysatyn kompanııalardyń 11,75 paıyz shyǵyn memleket sýbsıdııalaýy múmkin. Bul týraly Ulttyq ekonomıka mınıstrligi ashyq talqyǵa shyǵarǵan Úkimet qaýlysynda jazylǵan, dep habarlaıdy QazAqparat tilshisi.

«Saýda ortalyqtaryn, saýda úılerin jáne qazirgi zamanǵy formattaǵy saýda obektilerin salý jobalary boıynsha oblys ortalyqtary men monoqalalardaǵy saýda ortalyqtarynda saýda alańy keminde 3 myń sharshy metr bolǵanda jáne onda azyq-túlik taýarlaryn satýǵa arnalǵan saýda oryndary bolǵanda sýbsıdııalaýǵa jol beriledi. Kásipkerler úshin sýbsıdııalaý QR Ulttyq Banki belgilegen bazalyq mólsherlemeden aspaıtyn jáne 4,5 paıyzdyq syıaqy mólsherlemesi bar kredıtter boıynsha júzege asyrylady. Onyń 11,75%-yn memleket sýbsıdııalaıdy, al aıyrmasyn kásipker tóleıdi», - delingen jańa redaktsııada.

Aıta keteıik, qoldanystaǵy zańnamada mundaı norma joq. Qujatqa qosymsha berilgen túsindirmede jazylǵandaı, bul bastama qazirgi saýda alańdarynyń tapshylyǵyna jáne ónimder baǵasynyń qymbattaýyna baılanysty usynylyp otyr.

«Búgingi tańda saýda ınfraqurylymynyń jáne jalpy saýda alańdarynyń qazirgi zamanǵy formattarynyń tapshylyǵy baıqalady. Bul óz kezeginde joǵary jaldaý baǵalary bólshek saýda bıznesin uıymdastyrýǵa ketetin shyǵyndardyń artýyna jáne dúkenderdegi ónimder men taýarlardyń qymbattaýyna ákeledi. Saýdaǵa qatysýshylar úshin qaýipsiz jáne qolaıly jaǵdaılar jasaý, saýdanyń órkenıetti formattarynyń úlesin ulǵaıtý, sondaı-aq satylatyn ónimniń sapasyn baqylaýdy qamtamasyz etý maqsatynda qazirgi zamanǵy formattaǵy saýda obektilerin salý úshin memlekettik qoldaý sharalaryn kórsetý usynylady», - dep túsindirme berilgen qaýlyǵa.

Qujatty ashyq talqylaý 6 aqpanǵa deıin jalǵasady.