Saýd Arabııasynda mýmııalanǵan qabylan súıekteri tabyldy

ASTANA. KAZINFORM –  Saýd Arabııasynyń soltústiginde ǵalymdar úńgirlerden mýmııalanǵan qabylan súıekterin tapty, dep habarlaıdy Anadoly.

Qazba jumystarynda zertteýshiler jeti mýmııany jáne taǵy 54 qabylan qaldyqtaryn anyqtady. Arar qalasynyń mańyndaǵy bes úńgirde 130 jyldan 1800 jylǵa deıingi kezeńge jatatyn iri mysyqtardyń izderi saqtalǵan.

— Tabylǵan mýmııalar jaqsy saqtalǵan: aıaq-qoldary kepken, syrtqy kórinisi qurǵaq qabyqty eske túsiredi, — dedi ǵalymdar.

Zertteýdiń avtorlarynyń biri, Saýd Arabııasynyń Ulttyq jabaıy tabıǵat ortalyǵynyń qyzmetkeri Ahmed Býg, bul tabylǵan zatty «aımaqtaǵy qabylandardyń bolýyn zertteý úshin biregeı oqıǵa» dep atady.

Ǵalymdar alǵash ret mýmııalanǵan qabylannyń genetıkalyq taldaýyn júrgizdi. Nátıjeler olardyń DNQ-sy qazirgi azııalyq jáne soltústik-batys afrıkalyq qabylannyń genomyna jaqyn ekenin kórsetti.

Zertteýshilerdiń aıtýynsha, iri sútqorektilerdiń osyndaı jaqsy saqtalǵan qaldyqtary óte sırek kezdesedi. 

Qabylandar buryn Afrıkanyń keń aımaǵynda jáne Azııanyń keıbir óńirlerinde mekendegen. Qazirgi tańda olardyń tarıhı mekendegen aýmaǵynyń tek 9%-y ǵana saqtalǵan.

Mamandar mýmııalanǵan qabylandy tabý tek osy mysyqtardy qaıta tiriltýge ǵana emes, Arabııa túbeginde basqa joıylyp bara jatqan túrlerdi qaıta qonystandyrýǵa da úmit beredi dep atap ótti.

Zertteý nátıjeleri Communications Earth & Environment ǵylymı jýrnalynda jarııalanǵan.

Eske salaıyq, buǵan deıin Italııa taýlarynan 200 mıllıon jyldan astam ýaqytqa jatatyn dınozavr izderi tabylǵan bolatyn.