Saýd Arabııasy BUU Qaýipsizdik keńesin shuǵyl jınalysqa shaqyrdy
ASTANA. KAZINFORM - Saýd Arabııasy Gaza sektoryndaǵy gýmanıtarlyq apattyń aldyn alý úshin BUU Qaýipsizdik Keńesin shuǵyl otyrys ótkizýge shaqyrdy, dep habarlaıdy Anadoly agenttigi.
«Qorshaýdaǵy Gaza sektorynyń ońtústiginde ornalasqan Rafah qalasyna jasalǵan shabýyldardyń saldary óte qaýipti bolady», - delingen Koroldik Syrtqy ister mınıstrligi anklavtyń osy bóliginde Izraıldiń jerdegi yqtımal operatsııasyna baılanysty málimdemesinde.
Rafah - Izraıldiń jaýyzdyq agressııasynan qashýǵa májbúr bolǵan júzdegen myń beıbit turǵyndardyń sońǵy baspanasy.
«Biz onda pana izdegen adamdardy májbúrlep evakýatsııalaýdy qabyldamaımyz jáne qatań aıyptaımyz», - delingen habarlamada.
Saýd Arabııasy tez arada atysty toqtatýǵa shaqyryp, Izraıl sebep bolýy múmkin jańa gýmanıtarlyq apattyń aldyn alý úshin BUU Qaýipsizdik Keńesiniń shuǵyl otyrysyn ótkizý qajettigin málimdedi.
Izraıl premer-mınıstri Bınıamın Netanıahý aqpannyń 4-i kúni málimdeme jasap, Izraıldiń Mysyrmen shekarada ornalasqan jáne júzdegen myń palestınalyq Izraıl shabýyldarynan panalaǵan Rafah qalasyna qurlyq operatsııasyn bastaýdy josparlap otyrǵanyn ashyq aıtty.
