Saýalnamalar nátıjesi boıynsha qazaqstandyqtardyń 60%-ǵa jýyǵy referendýmǵa qatysýǵa daıyn
AQTAÝ. KAZINFORM – 25 qyrkúıek kúni Aqtaý qalasynda «SARAP» eksperttik klýbynyń «Energetıkalyq saıasat jáne azamattyq jaýapkershiliktiń qoǵamdyq sanadaǵy kórinisi» atty aımaqtyq jıyny ótti. Bul týraly Qoǵamdyq kommýnıkatsııa ortalyǵy habarlaıdy.
Jıynda Memleket basshysy Qasym-Jomart Toqaevtyń 2 qyrkúıektegi «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýy talqylandy. Kún tártibine sáıkes Joldaýda qarastyrylǵan memlekettik sheshimder qabyldaýdaǵy azamattardyń qatysýy, azamattyq belsendilik pen jaýapkershilik, sondaı-aq energetıkalyq saıasat, atom elektr stantsııasyn salý týraly jalpyulttyq referendým suraqtary qarastyryldy.
- Bárińiz biletindeı referendýmnyń naqty ótetin ýaqyty 6 qazan bolyp belgilendi. Zertteý ınstıtýty retinde basqa áriptes ınstıtýttardyń AES taqyrybyndaǵy saýaldaryna nazar aýdardyq. Qoǵamdyq saıasat ınstıtýty 2000 adam arasynda jappaı jedel saýalnama júrgizgen. «Sotsıs-A» ınstıtýty 1000 adammen telefon arqyly saýalnama júrgizdi. Strategııalyq ınstıtýty 8000 adam arasynda saýalnama júrgizgen. Osylardyń jaýaptaryn jınaqtap aıtar bolsaq qyrkúıek aıynda ǵana saýalnamaǵa qatysqan 55-59% referendýmǵa qatysýǵa daıyn ekenin jetkizdi. 59-60% bóligi AES salýdy qoldaıtyndaryn jetkizdi. Qazaqstanda AES salý máselesi - ekonomıkalyq, áleýmettik máseleniń bárin sheshetin jalǵyz ınstrýment dep qaramaýymyz qajet. Alaıda ol - ǵylym, tehnologııa, ınfraqurylym salalaryn damytýdyń bir katalızatory retinde bola alady dep esepteımiz. AES-ti qamtamasyz etetin energetıkalyq qaýipsizdik pen onyń jetispeýshiliginiń ornyn toltyrýǵa búgingi kúni yqpal ete alady dep oılaımyz. Ony tolyqqandy osy salanyń barlyǵyn damytý úshin biz endi keshendi damytýymyz kerek. Balamaly energııa kózderi, ınvestıtsııa, bıznes, halyqtyń ál-aýqaty bul turaqty túrde kele jatqan eń ózekti máseleler. Búgin álem elderi de osy energetıkalyq qaýipsizdik, ekologııa oǵan qoljetimdilik taqyryptaryn turaqty túrde kóterip kele jatyr. Óıtkeni búkil álem boıynsha energııa tapshylyǵy sezilip keledi. Bul damýshy elderde halyq sanynyń artýyna baılanysty ásirese Ortalyq Azııa men Azııa elderinde 2050 jylǵa qaraı álemdik energııa tutyný kólemi 50 paıyzǵa artady degen derekti Halyqaralyq Energetıka agenttigi kórsetip otyr, - dedi «Qazaqstandyq qoǵamdyq damý ınstıtýty» AQ Basqarma tóraǵasynyń orynbasary Oljas Beısenbaev.
Aıta ketsek, is-sharaǵa Mańǵystaý oblystyq jáne qalalyq máslıhat depýtattary, Qoǵamdyq keńes músheleri, atom energııasy salasynyń mamandary, jastar jáne azamattyq qoǵam, partııa, QQDI ókilderi qatysty.
