Saýalnama: qazaqstandyqtardyń 80% astamy Elbasynyń Joldaýynan habardar

ASTANA. QazAqparat - Eýrazııalyq ıntegratsııa ınstıtýty Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyna qatysty el turǵyndarynyń oı-pikirin bilý maqsatynda elimizdiń iri qalalarynda, oblys ortalyqtary men aýyldarynda qaıtalama irikteýmen telefon arqyly jedel saýalnama júrgizdi, dep habarlaıdy QazAqparat.

«Memleket basshysy Joldaýdy jarııalaǵaly az ýaqyt ótkenine qaramastan, saýalnama barysynda turǵyndardyń qujatta aıtylǵan negizgi ıdeıalar týraly joǵary deńgeıde habardar ekendikteri jáne oǵan qyzyǵýshylyq tanytyp otyrǵandyqtary anyqtaldy. Saýalnamaǵa qatysqandardyń basym bóligi (82%) onyń mazmunymen tanys. Suralǵandardyń keminde jartysy saýalnama júrgizilgen kezde bul qujattyń basty erejelerimen tolyq nemese jartylaı tanysyp úlgergen», - delingen Eýrazııalyq ıntegratsııa ınstıtýtynyń aqparatynda. 

Atap ótilgendeı, qazaqstandyqtar Joldaý mazmunyn joǵary baǵalaǵan.

«Joldaýmen tanysqan respondentterdiń basym bóliginiń pikirinshe, onda halyqtyń turmys sapasy men ál-aýqatyn arttyrý boıynsha qajetti sharalar eskerilgen (84,6%). Naqty osy sharalar halyqtyń túrli toptarynyń arasynda pikir týdyrdy. Atap aıtqanda, suralǵandardyń úshten bir bóliginen astamy eń tómengi jalaqy mólsherin, sonymen qatar muǵalimder men dárigerlerdiń eńbekaqysyn kóterý boıynsha sharalardy este saqtap qalǵan ári olardy qoldaıdy (34,5%). Árbir besinshi adam (20,7%) densaýlyq saqtaý sapasy men qoljetimdiligin arttyrý sharalaryn, taǵy sonsha adam - bilim sapasyn arttyrýdy qoldaıdy. Árbir onynshy respondent turǵyn úıdiń qoljetimdiligin qamtamasyz etý sharalaryn atap ótti. Ásirese, bul másele qala turǵyndary úshin ózekti. Jas urpaq jastar jáne otbasy ınstıtýtyn keshendi qoldaý sharalaryn, sondaı-aq 2019 jyldy Jastar jyly dep jarııalaýdy oń baǵalady», - delingen habarlamada.

Qazaqstan halqy Joldaýda aıtylǵan densaýlyq saqtaý jáne bilim berý salasyndaǵy, halyqtyń tabys deńgeıiniń jáne turǵyn úıdiń qoljetimdiliginiń artýy, baǵa men kommýnaldyq tarıfterdiń ósýin tejeý, sondaı-aq sybaılas jemqorlyqpen kúres boıynsha sharalardy qoldap qana qoımaı, olardyń birinshi kezekte iske asyrylýy qajettigine basa kóńil bólýde.