Saryaǵash aýdanynda jańadan 8 mádenıet úıi men kitaphana ashyldy
Sonyń arqasynda shalǵaıdaǵy eldi mekenderde rýhanııat pen ónerdiń damýyna múmkindik týyp otyr, dep habarlaıdy QazAqparat tilshisi.
Aýdanda bıyl jyl sońyna deıin taǵy altaýy ashylady. Jańadan esigin aıqara ashqan mádenıet oshaqtarynda birneshe úıirme men ájeler klýby turaqty jumys isteıdi. Sondaı-aq taǵy bir jańashyldyq, kitaphana janynan bilim ortalyqtary ashylýda. Mundaı ıntelektýaldy alańdar aýyl turǵyndary úshin zııatkerlik demalys oryndaryna aınaldy. Mektepte oqıtyn jasóspirimder de aýyldardaǵy mádenıet úılerine baryp kitaphanaǵa jıi keletin bolǵan. Óıtkeni bilim ortalyǵynda qajetti aqparattyń barlyǵyn kez kelgen formatta alýyna múmkindik bar. Intelektýaldy kontent: ıaǵnı kitaptar, merzimdi basylymdar, aýdıo, beıne jazbalardy, ǵalamtordy erkin paıdalanady.
«Sabaqtan ózimizge kerekti málimetter, qosymshalar, aqparattarmen tanysamyz. Túrli kitaptar oqımyz. Tek qana kitap oqý emes, bir-birimizben pikir talastyramyz. Túrli úıirmeler bar. Internet tegin»,- deıdi mektep oqýshylarynyń biri Aıaýlym Ábdikárim.
Aýyl turǵyndary bos ýaqytynda endi bilim ortalyǵyndaǵy aktsııalarǵa, shyǵarmashylyq kezdesýlerge, sheberlik klastary men zııatkerlik oıyndarǵa da qatysa alady. Olardyń shahmat, toǵyzqumalaq oınaýyna da jaǵdaı jasalǵan. Aýyl balalary shetinen ónerdi de úırenip jatyr.
Saryaǵash aýdanynda qazir 11 mádenıet úıi men 10 eldi mekende klýb jumys isteıdi. Munda dombyra, bı, kórkemsóz oqý jáne vokal úıirmeleri ashylǵan. Jurtqa rýhanı azyq beretin óner ordalarynyń sany keleshekte munan da artqaly otyr. Sala mamandary keler jyly aýdanda taǵy 8 mádenıet úıi salynatynyn aıtady. Olardyń sáýlettik jobalaý qujattary ázirlenip, qazynadan qarjy bólýge usynylǵan.
