Saryaǵash aýdanynda kóshpeli qoǵamdyq qabyldaý ótti

SARYAǴASh. QazAqparat – Túrkistan oblysy Saryaǵash aýdanynda «Nur Otan» partııasynyń «Halyqqa kómek» biryńǵaı áleýmettik tereze» jobasy aıasynda kóshpeli qoǵamdyq qabyldaý ótti. Partııanyń aýdandyq fılıalynyń tóraǵasy Muhıt Otarshıevtiń tóraǵalyǵymen ótken qabyldaýda Jemisti jáne Jibek joly aýyldyq okrýgterindegi sheshimin tappaı otyrǵan máseleler sóz boldy, dep habarlaıdy QazAqparat tilshisi.

Kóshpeli qoǵamdyq qabyldaýǵa «Nur Otan» partııasy Saryaǵash aýdandyq fılıaly tóraǵasynyń birinshi orynbasary Q.Qystaýbaev pen oblystyq máslıhat depýtaty A.Salımov, aýdandyq máslıhat depýtattary men ortalyq aýrýhananyń bas dárigeri B.Mırzalıev jáne derbes bólim basshylary qatysty. Qabyldaýǵa jazylǵan jergilikti turǵyndar aýdan ákimine jeke jáne aýyldyq okrýg kóleminde sheshimin tappaı kele jatqan kúrdeli máseleler boıynsha ótinishterin jetkizdi.

Máselen, Zortóbe eldi mekenindegi ıAsaýı jáne Abaı kóshelerine asfalt salý, Jańa turmys eldi mekeni aýmaǵynan ótetin «Shymkent – Jetisaı» avtomobıl jolyna jaıaý júrginshilerge arnalǵan aspaly kópir salý jaıy aıtyldy.

Sondaı-aq, bir azamat múgedektigin ІІІ-toptan ІІ-topqa aýystyrý kerektigin sóz etse, ózge turǵyn «Jibek joly» keden beketi mańyndaǵy «Qazavtojol» UQ teńgerimindegi jer ýchaskelerin abattandyrý qajettigin jetkizdi. Sol sııaqty Sarqyrama eldi mekeninde eski elektr jaryǵyn jańa elektr jaryǵyna aýystyrý, Jemistige emhana salý, Tyń aýylynan feldsherlik-akýsherlik pýnkt ashý, Jemisti aýylyna jańa mektep salý, Jemisti eldi mekenin aýyz sýmen qamtamasyz etý jaıly ótinishter de aıtylyp qaldy.

Kezdesý barysynda aýyldyq okrýg turǵyndary kótergen ártúrli ózekti máseleler boıynsha aýdan ákimi tarapynan tıisti jaýap berildi. Sonymen qatar, kóterilgen máselelerdi tolyq ári sapaly sheshý boıynsha aýdan basshysy naqty tapsyrmalar júktedi.

Aıta keteıik, kóshpeli qoǵamdyq qabyldaý bılik pen halyq arasyndaǵy baılanysty nyǵaıtý, turǵyndar arasynda kúndelikti sheshimin tappaı júrgen túıtkildi máselelerdi sheshý maqsatynda uıymdastyrylyp otyr.