Saryaǵash aýdanynda Qazaqstan halqy tilderi kúni merekesi atalyp ótti
Aýdandyq mádenıet, tilderdi damytý, dene shynyqtyrý jáne sport bóliminiń uıymdastyrǵan sharasyna aýdan ákiminiń orynbasary M. Seıtimbetov pen aýdandyq sot tóraǵasy T.Mashrapov, etnomádenı ortalyq tóraǵalary men mádenı ortalyqtardyń ónerpazdary qatysty, dep habarlaıdy QazAqparat tilshisi.
Atalǵan jıynda taqyrypqa saı daıarlanǵan beınerolık kórsetilip, teatrlandyrylǵan kórinis qoıyldy. Aýdan ákiminiń orynbasary M.Seıtimbetov kópshilik aldynda quttyqtaý sóz sóılep, jurtshylyqty yntymaq birlikke shaqyrdy.
«Bul merekeniń aýdan halqy úshin mańyzy zor. Aýdanymyzda memlekettik til saıasatyn júzege asyrýda eleýli jumystar atqarylýda. Sonyń bir dáleli – memlekettik tildi jetik meńgerip, odan ózge úsh tildi qatar meńgergenderdiń de sany artqan. Eń bastysy, túrli etnos ókilderiniń ana tilderi men memlekettik tildi meńgerýine jaǵdaı jasalǵan», – dedi aýdan ákiminiń orynbasary.
Til qundylyqtary men onyń mańyzy jaıly sóz sóılegen aýdan basshysynyń orynbasary birqatar azamattardy alǵys hattarmen marapattady. Sonymen qatar, aýdandyq máslıhat hatshysy Baqytjan Sadyqovtyń alǵys haty túrli sala mamandaryna tabystaldy.
Merekelik shara sońy kontserttik baǵdarlamaǵa ulasty.
