Saryaǵashta úı aýlasynan ashylǵan sport zaldan jeti el chempıony shyqqan
TÚRKІSTAN. KAZINFORM – Saryaǵashta aýyl muǵalimi úıiniń aýlasynan sport zal ashty.
Saryaǵash aýdany Darbaza aýylynyń turǵyny Janzaq Sydyqov jeke úıiniń aýlasynan sport zal ashyp, balalardy sportqa baýlyp keledi. Aýyl mektebinde dene shynyqtyrý páninen sabaq beretin ustazdyń bul ıgi isti qolǵa alǵanyna jıyrma jyldan astam ýaqyt bolǵan. Eki qabatty ǵımaratta jas sportshylarǵa qajetti jaǵdaıdyń barlyǵy jasalǵan.
Nysan ishi jyp jyly. Jýynatyn bólmede ystyq sý men salqyn sý toqtaýsyz aǵyp tur. Kıim aýystyratyn bólmeler de bólek-bólek ornalasqan. Eń bastysy - mundaǵy úsh tennıs ústelinde balalar kúndelikti tegin jattyǵý jasaıdy.
«1985 jyly aýyldaǵy mektepke muǵalim bolyp qyzmetke ornalastym. 1986 jyly mektep janyndaǵy sport zal órtenip ketti. Sodan balalarǵa dene shynyqtyrý sabaǵyn óte almaı qaldyq. 4-5 jyl boıy qatty qınaldyq. Bul máseleni sheshý úshin sport zal salý kerek boldy. Keıinnen úıimniń aýlasynan eki qabatty sport ǵımaratyn salyp, aýyl balalary úshin paıdalanýǵa berdim», - deıdi Janzaq Sydyqov.
Alǵashqyda úı aýlasynan ashylǵan sport zalǵa kelýishler az bolypty. ıAǵnı, jastar úırenise almaǵan. Keıinnen ústel tennıs úıirmesi ashylǵan soń, jattyǵýǵa jazylýshylar qatary kóbeıgen. Qazir munda 75 jasóspirim turaqty túrde jattyǵýǵa keledi.
«Bes topqa bólip sabaq ótemiz. Úsh topqa ózim jetekshilik etemin. Onyń ekeýinde ul balalar bolsa, bireýi qyzdarǵa arnalǵan. Al, eki topqa Baqdáýlet esimdi ulym sabaq beredi. Ol oblystyq olımpıada rezervin daıyndaıtyn sport mektebinde aǵa jattyqtyrýshy qyzmetin atqarady. Jalpy balalardyń sportqa degen qyzyǵýshylyǵy óte joǵary. Іshinde nátıje kórsetip, respýblıkalyq, oblystyq jarystardan top jaryp jatqandary kóp», - deıdi Janzaq Ómirzaquly.
Shaǵyn ǵana aýyldan ashylǵan úıirmeden ázirge jeti Qazaqstan chempıony shyqqan.
Respýblıkalyq, oblystyq deńgeıden de júldemen kelip jatqan shákirtter kóp. Al, aýdandyq jarystarda darbazalyq jastardan júldeli oryndy jeńip alý qıyn.
«Jalpy tennıs úıirmesine 5-6 jastan bastap qabyldaımyz. Erejelerdi úırenip, eptilikterin kórsetken boıda jarystarǵa jiberemiz. Qazir eki shákirtim Almatydaǵy «Shańyraq» sport mektebinde oqyp jatyr. Dana Ahmetova esimdi jerlesimiz «Qazaqstan Temir joly» qyzmetkerleri arasynda úsh júrkin chempıon boldy. Ádilet Ómirzaq, Nurjigit Joldybaı, Ámirhan Saparáli, Ázirbek Perdebaı jáne taǵy basqa da shákirtterimmen maqtana alamyn» - deıdi Janzaq Sydyqov.
Janzaq Ómirzaquly aýyldaǵy S.Baıǵozıev atyndaǵy №70 mektepte dene shynyqtyrý pániniń muǵalimi bolyp áli de qyzmet atqarady. Sondaı-aq, aýdandyq №2 Balalar men jasóspirimder sport mektebinde jattyqtyrýshy bolyp jumys isteıdi. Qyryq jylǵa jýyq eńbek ótili bar azamat bir-eki jyl kóleminde zeınetke shyqpaq.
«Beınettiń zeınetin kórýge ketsem de, jastardy sportqa baýlyp, qoǵamdyq jumystarǵa qatysýdan qol úzbeımin. Jastar elimizdiń bolashaǵy ǵoı. Jastardy sportqa baýlý azamattyq boryshym dep bilemin. Bizdiń jas kezimizde mundaı múmkindikter bolmady. Sondyqtan, men jastarǵa qolymnan kelgenshe bar jaqsylyqty jasaǵym keledi» - deıdi Janzaq Ómirzaquly.
