Elimizde sarbazdarǵa kredıt berýge tyıym salý mehanızmi ázirlendi
ASTANA. KAZINFORM — Elimizde merzimdi áskerı qyzmetke shaqyrylǵan azamattar, olardyń bank aldyndaǵy qaryzy, mıkrokredıtiniń bar-joǵy nemese kredıttik tólemdi keıinge qaldyrý týraly málimet almasý qaǵıdalaryna ózgerister engizildi.
Qarjy naryǵyn retteý jáne damytý agenttiginiń qaýlysyna sáıkes, atalǵan joba 2025 jylǵy 30 maýsymdaǵy «Qarjy naryǵyn damytý, qarjylyq qyzmetter tutynýshylarynyń quqyǵyn qorǵaý, baılanys salasy jáne artyq zańnamalyq retteýdi joıý máseleleri boıynsha Qazaqstan respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań aıasynda daıyndaldy. Atalǵan zańda merzimdi áskerı qyzmet óteý kezinde áskerı qyzmetshilerge bankten kredıt jáne mıkrokredıt berýge tyıym salý qarastyrylǵan.
Atap aıtqanda, Qorǵanys mınıstrligi men kredıttik bıýro arasyndaǵy merzimdi áskerı qyzmetshiler týraly málimetpen almasý tártibi reglamentteledi. Ol málimet jeke tulǵanyń kredıttik esebine engiziledi.
Sondaı-aq, jobada kredıttik esepte áskerı qyzmet ótep jatqandyǵy týraly aqparat bolǵan jaǵdaıda, bank pen mıkroqarjy uıymdarynyń azamatqa nesıe berýden bas tartý mindeti qarastyrylǵan.
Memlekettik organdar men kredıttik bıýro arasyndaǵy ózara árekettesý tártibi tolyqtyryldy. Endi bank qaryz sharttary nemese mıkrokredıt berý sharty boıynsha tólemdi keıinge qaldyrýdy toqtatý jáne syıaqy esepteýdi qaıta bastaý barysynda áskerı qyzmetke shaqyrylǵandar týraly málimetti kredıtordyń alý tártibi engizildi.
Kredıtor bank qaryz nemese mıkrokredıt bermes buryn áskerge shaqyrylatyn jastaǵy azamattyń kredıttik mártebesin tekseredi. Eger ol merzimdi áskerı qyzmetshiniń mártebesine ıe bolsa, nesıe berilmeıdi.
Al merzimdi áskerı qyzmetten bosatylǵan jaǵdaıda (onyń ishinde qyzmet merzimi aıaqtalmaı turyp bosatylsa) kredıttik bıýro azamattyń mártebesin kredıttik esepten alyp tastaıdy.
Qujat «Ashyq NQA» portalynda 17 shildege deıin kópshilik talqylaýyna usynylyp otyr.
Aıta keteıik, elimizdiń Qorǵanys mınıstrligi áskerde júrgen sarbazdyń nesıesin toqtatý úshin ata-ana ne isteý kerektigin túsindirdi.