Sarapshylar aldaǵy prezıdent saılaýynyń erekshelikterin talqylady

ALMATY. QazAqparat - Almatyda «Prezıdent saılaýy-2019: aldaǵy naýqannyń erekshelikteri» konferentsııasy ótti. Jıynda belgili saıasatkerler, saıasattanýshylar, sarapshylar Qazaqstanda ótetin aldaǵy prezıdent saılaýy týraly pikir almasty, dep habarlaıdy QazAqparat tilshisi.

Belgili saıasattanýshy Aıdos Sarym bıyl ótetin prezıdent saılaýynyń aldyńǵy saılaýlardan basty ereksheligi nede ekenin aıtyp berdi.

«Jurtshylyqtyń aıtýynsha, saılaý bıýlletenine kem degende 6-7 adam kiredi. Bıylǵy saılaýda saıası spektr, sanalýan saıası ıdeologııa ókilderi ózderin usynyp otyr. Ulttyq qozǵalys ókilderi, dástúrli saıası partııalar, oppozıtsııalyq demokratııalyq kúshterdiń ókilderi bar. Tuńǵysh ret Qazaqstan tarıhynda áıel adam saılaýǵa túseıin dep otyr. Qoǵamnyń saılaý týraly pikirin ózgerte alamyz. Saılaý komıssııasy, ákimshilikke, atqarýshy organdarǵa 92-93 paıyz degen sandardyń magııasy qysym jasap jatqan joq. Jurttyń bári saılaýǵa qatyssyn degen talap joq. Bul kishkene bolsa da, saılaýdyń durys ótýine yqpal etedi. Kandıdattardyń búkil Qazaqstandy aralaýǵa ýaqyty bolmaıdy. Memlekettik telearnalar kóbirek debat uıymdastyryp, TV, áleýmettik jeli, ıÝtýbta jıi-jıi pikirtalastar ótkizý kerek», - dedi Aıdos Sarym.

Onyń aıtýynsha, qazir Qazaqstanǵa jańa býyn keldi.

«1990 jyldardyń basyndaǵy erejelerdi moıyndaı bermeıtin jas urpaq keldi. Olardyń saılaý ınstıtýttaryna degen qurmeti men senimi ne bolmaq? Jastardyń qatysýymen jasalǵan dúnıelerge nazar aýdaryńyzdar. Buny ózin-ózi izdeý dep baǵalaýymyz kerek. Aqyldy qoǵam bolǵymyz kelse, jastardy tartyp, saılaý mádenıetin qalyptastyryp, jalpy saıasatqa aralasýyna múmkindik berý kerek», - dedi ol.

Qazaqstan ınternet qaýymdastyǵynyń tóraǵasy Shavkat Sabırov ınternet jelisindegi baqylaý jóninde sóz qozǵady.

«Biz 190 resýrsty baqylap otyrmyz. Sáýirde Feısbýk jelisinde Darıǵa Nazarbaevanyń esimi kóp ataldy. Feısbýk jelisiniń saıasılaný kórsetkishi óte joǵary. VKontakte, Twitter, Odnoklassnıkı jelilerinde kóbinese halyqaralyq jańalyqtar tanymal boldy. VKontakte jelisinde lokaldy jańalyqtar kóp qaraldy», - dedi Shavkat Sabırov.

Fılosof Natalıa Seıdahmetovanyń aıtýynsha, búginde jastardyń elektroraldy mádenıeti tómendegen.

«Osy jerde Bısmarktiń sózi eske túsedi. Saıasatqa aralaspasań, onyń nátıjesiniń jemisin jeısiń. Qazir kóp adamdar meniń daýsym eshteńeni sheshpeıdi dep, úıinde qalady. Alaıda el taǵdyry ár adamnyń belsendiligine baılanysty ekendigin aıtqym keledi. Jastardyń saılaý mádenıetin arttyrý úshin ınternet keńistiginde jalpyǵa ortaq resýrs qalyptastyrý kerek», - dedi Natalıa Seıdahmetova.