Sarapshy Qazaqstannyń ERA-GLONASS júıesinen «bas tartýyna» qatysty pikir bildirdi

ASTANA. QazAqparat - Qazaqstanda ERA-GLONASS júıesiniń óshirilgeni týraly birqatar qazaqstandyq jáne reseılik BAQ-ta jarııalanǵan habarǵa qatysty Ǵaryshtyq tehnıka jáne tehnologııalar ınstıtýty dırektorynyń orynbasary Nurlan Saterov «QazAqparat» HAA tilshisine óz pikirin bildirdi.

Eske sala ketsek, Qorǵanys jáne aeroǵarysh ónerkásibi mınıstrligi Aeroǵarysh komıtetiniń Ǵaryshtyq tehnıka jáne tehnologııalar ınstıtýty jol-kólik apaty oryn alǵanda jedel aqparat beretin qazaqstandyq júıeniń (EVAK) ázirleýshisi bolyp tabylady.

 «Qazaqstannyń ERA-GLONASS júıesinen bas tartýy týraly habar shyndyqqa janaspaıdy, bizdiń elimiz atalǵan reseılik júıeni paıdalanbaıdy, arada tek qana ıntegratsııa bar», - dedi N.Saterov.

 «Atalǵan aqparat ǵalamtor betterine jarııalanǵan soń, biz tez arada ERA-Glonass operatorlaryna habarlastyq, olar RF aýmaǵynda ERA-Glonass júıesiniń óshirilýi týraly aqparatty rastamady», - dedi ol.

«Bizdiń EVAK júıesiniń aqparattyq qaýipsizdik talaptaryna keler bolsaq, Qazaqstannyń uıaly operatorlarymen bekitilgen shart negizinde 112 Biryńǵaı kezekshi-dıspetcherlik qyzmetine tirkelgen qońyraýlar ǵana túsetin  bolady. Jalǵan qońyraýlar EVAK júıesiniń irikteý ortalyǵynda tekserýden ótedi. Qazirgi ýaqytta reseılik ERA-GLONASS júıesinde de dál osyndaı jumystar júrgizilip jatyr», - dedi qazaqstandyq EVAK júıesin ázirleýshiler ókili.

Ol ERA-Glonass júıesiniń óshirilýi týraly aqparatty ǵalamtorǵa QR EVAK GAIS jumysynda álsiz quziretke ıe tulǵalar jarııalady degen pikir aıtty.

«EVAK júıesi pılottyq rejimde jumys isteýge tolyǵymen daıyn. Jaqyn kúnderi QR IDM Kólik komıteti EVAK júıesiniń operatoryn anyqtaýy tıis. Barlyq 14 oblys ortalyqtarynyń jáne Astana men Almaty qalalarynyń TJ departamentterinde EVAK júıesi operatorlarynyń avtomattandyrylǵan jumys oryndary ashyldy. «Biz EVAK júıesin iske qosýǵa tolyq daıynbyz», - dep túıindedi N.Saterov.