Sarapshy aıaz ben qalyń qardyń kúzdik daqyldarǵa áserin baǵalady
ASTANA. KAZINFORM – Reseıdiń birqatar óńirinde qatty aıaz ben qalyń qar jamylǵysy kúzdik daqyldardyń 5,9%-ǵa deıin joıylýyna ákelýi múmkin, dep habarlaıdy TASS.
Bul boljamdy Altaı ólkesiniń Belokýrıha qalasynda ótken Qysqy astyq konferentsııasynda «Prozerno» kompanııasynyń dırektory Vladımır Petrıchenko aıtty.
– Egilgen kúzdik daqyldardyń jalpy kólemi shamamen 17,9 mln gektardy quraıdy. Sonyń shamamen 5,9%-y joıylýy múmkin, – dedi ol.
Sarapshynyń aıtýynsha, qystyń basy kúzdik daqyldar úshin qolaıly bolǵan. Alaıda keıin Rostov oblysy, Qalmaq Respýblıkasy, Saratov oblysy, Altaı ólkesi jáne Volgograd oblysynda qatty aıaz saldarynan topyraq túptený kezeńindegi núktege deıin mınýs 10 gradýsqa deıin qatqan.
Sonymen qatar Joǵarǵy jáne Orta Edil boıynda, sondaı-aq Reseıdiń ortalyq aımaqtarynyń bir bóliginde qardyń qalyń túsýi saldarynan egistiktiń bir bóligi tunshyǵyp, úsip ketý jaǵdaılary tirkelgen.
– Eger túptený núktesindegi mınýs 10 gradýs keı jaǵdaıda daqyldarǵa asa qatty áser etpeýi múmkin bolsa, qalyń qar saldarynan tunshyǵý egistiktiń tolyq joıylýyna ákelýi yqtımal, – dedi Vladımır Petrıchenko.
Aıta keteıik, Qysqy astyq konferentsııasy 25-27 aqpan aralyǵynda Altaı ólkesiniń Belokýrıha kýrortty qalasynda ótti.
Іs-shara Reseıdiń astyq salasyndaǵy kásiporyndardy damytý strategııalaryn qalyptastyrýǵa, tıimdi basqarýshylyq sheshimder qabyldaýǵa jáne naryqtaǵy ózekti aqparat almasýǵa baǵyttalǵan.
Aıta keteıik, Qazaqstan men Reseı kúndelikti sý deńgeıi týraly aqparat almasyp otyrady.