Saranda satýshyny óltirgen qylmyskerge qatysty sot otyrysy bastaldy
QARAǴANDY. KAZINFORM — Qaraǵandyda Saran qalasyndaǵy dúkenderdiń birinde satýshyny óltirýge qatysty is boıynsha sot protsesi bastaldy. Sot otyrysynda aıyptalýshynyń buryn esirtki qoldanǵany belgili boldy.
Qylmystyq ister jónindegi Qaraǵandy oblystyq mamandandyrylǵan aýdanaralyq sotynda sýdıa Bekzat Shalǵymbaevtyń tóraǵalyǵymen rezonansty is qaralyp jatyr. Sottalýshy – QR azamattyǵy joq 51 jastaǵy Saran turǵyny. Tergeý barysynda aıyptalýshynyń urlyq jasaǵany úshin buryn birneshe ret ákimshilik jáne qylmystyq jaýapkershilikke tartylǵany anyqtaldy. Budan basqa, onyń buryn esirtki qoldanǵany da belgili boldy.
- Keshendi narkologııalyq-psıhıatrııalyq saraptamanyń qorytyndysyna sáıkes, sottalýshyda apıyn jáne kannabıoıdtar túrindegi psıhotroptyq zattar qabyldaý nátıjesinde psıhıkalyq jáne minez-qulyq buzylýlary baıqaldy. Alaıda dál osy saraptama onyń qylmys jasaǵan kezde óz áreketterine esep bergenin kórsetti. 22 qańtarda sottalýshy úıinen alyp kelgen qara saby bar ańshylyq pyshaqpen mınımarketke kelgen. Aldymen ol mınımarkette satýshydan basqa eshkim joq ekenine kóz jetkizgen. Temeki satyp alamyn degen syltaýmen ǵımaratqa kirip, sodan keıin dúkenge bógde adamdardyń kirýine jol bermes úshin kiretin metall esikti ishki jaǵynan jaýyp tastaǵan. Ańshylyq pyshaǵyn qabynan alyp, oń qolyna ustap, dúken ıesi turǵan sóreniń arǵy jaǵyna ótken. Ol aqsha saqtaıtyn kassalyq apparatqa bet alǵan, biraq satýshy áıel kómekke shaqyryp, aıqaılaı bastaǵan, sonan soń qylmyskerdi dúkennen qýyp shyqpaqshy bolyp, qarsylyq kórsetýge tyrysqan, - dep prokýror Janqozy Naqyshev aıyptaý aktisin oqydy.
Іs materıaldaryna sáıkes, osydan keıin qaraqshy satýshyǵa birneshe ret pyshaq suqqan, onyń bireýi keńirdekke, aortaǵa, al ekinshisi ish qýysyna kirip, ómirlik mańyzy bar organdarǵa tıgen. Áıel kóp qan joǵaltyp, birneshe mınýtta sol jerde jan tapsyrǵan.
Sodan keıin er adam kassadan 180 myń teńgeni alyp, oqıǵa ornynan qashyp ketken. Sol kúni ony polıtseıler quryqtady. Onyń páterin tintý kezinde qylmys jasaǵan kezde kıgen kúrteshe men báteńkesi tabyldy.
Aıyptalýshy sotta kinásin moıyndaǵan joq.
- Men ol kúni úıden emes, jumystan kele jatqan edim. Tergeýshiler maǵan esirtki berip, ózderine qajet málimetti aıtýǵa májbúrledi. Men kináni moıyndamaımyn, - dep málimdedi sottalýshy.
Alaıda kýágerlerdiń biri sol kúni qylmyskerdi avtobýs aıaldamasynyń janynda kórgenin jáne onyń erekshe mazasyzdanyp turǵanyn baıqaǵanyn jetkizdi.
- Ol sol kezde erekshe kúıip-pisip, mazasyzdanyp turǵandaı kórindi. Men ony jaqsy tanımyn, sol kúni ol «komýflıaj» kúrteshede bolǵany esimde. Men jumysqa baratyn avtobýsymdy kútip turǵan edim. Avtobýs kelgen bette, elektrık áriptesim dúkenge baryp, sosyn bizge júgirip kelip, kisi ólimi týraly habarlady. Men dereý dúkenge júgirip bardym, ol jerde qoldary eki jaqqa jaıylyp, etbetinen jatqan áıeldi kórdim, jan-jaǵy qan-josa. Onyń keńirdeginde tesikti baıqadym, kózderi ashyq kúıinde qalǵan. Demalmaı jatyr eken, - dedi sotta kýágerlerdiń biri.
Sot otyrysy barysynda taǵy bir kýáger aıyptalýshyny sol kúni tańerteń kórgenin aıtty.
- Men kásiporynda kúzetshi bolyp jumys isteımin jáne árdaıym kameralardy qadaǵalaımyn. Sol kúni tańerteń kóshege shyǵyp, joldy qardan tazalap jatqan edim. Sol kezde tizesinen keletin qardy ombylap ótip bara jatqan er adamdy kórdim. Meni onyń qardan tazartylǵan jolman júrmeı, ombylap bara jatqany tańqaldyrdy. Bir mezette ol toqtap, buryldy. Sol kezde júzin anyq kórdim. Sosyn kisi ólimi jaıly estigende, osy kisi ekenin birden túsindim, - dedi sotqa ekinshi kýáger.
Qaza tapqan kelinshektiń týystary qylmyskerdi qatań jazalaýdy talap etýde. Olardyń aıtýynsha, beınekameralardaǵy barlyq jazbalar onyń kinásin dáleldep otyr.
- Bizge bul qaza óte aýyr tıdi. Adam qolynan qaıtqany bizdiń otbasy úshin qıyn jaǵdaı boldy. Artynda eki balasy jetim qaldy. Sot bastaldy. Durys sheshiledi dep oılaımyz. Eń qatań jaza – ómir boıy bas bostandyǵynan aıyrylsa eken dep otyrmyz. Onyń kinási naqty derektermen dáleldenip jatyr. Beınekameralardan barlyǵy kórinip tur. Úkimet tarapynan belgili bir ótemaqy talap etý týraly ereje bar, soǵan sáıkes moraldy ótemaqy retinde 30 mıllıon teńge óndirip alýdy suraımyz, - dedi marqumnyń aǵasy Ertaı Tileýhabyl.
Esterińizge sala keteıik, osy jyldyń qańtar aıynda Saran qalasyndaǵy dúkenderdiń birine qaraqshy túsip, satýshyny óltirgen bolatyn.