Sapaly urpaq tárbıeleýge óz úlesimdi qosqym keledi - Qanat Islam

ASTANA. KAZINFORM – 2024 jyly 1 naýryz kúni Almaty qalasyndaǵy Balýan Sholaq atyndaǵy sport saraıynda belgili boksshy Qanat Islamnyń uıymdastyrýymen halyqaralyq deńgeıdegi kásipqoı boks keshi ótedi.

Osyǵan oraı belgili kásipqoı boksshy Qanat Islam KAZINFORM tilshisine jekpe-jek keshine daıyndyǵy men jarystyń maqsaty týraly shaǵyn suhbat berdi.

- Qanat myrza, alda kásipqoı bokstan úlken jekpe-jek keshin uıymdastyrasyz. Jarystyń basty maqsatyna toqtalyp ketseńiz...

- Boks keshine 20 kún ǵana qaldy. Basty maqsatymyz – birinshiden qazaqtyń jas jigitterine, batyrlaryna qoldaý kórsetý. Bolashaq chempıondarymyzdyń álemdik arenaǵa shyǵýyna jol ashý.

Ekinshiden – jastarymyzdy sportqa tarta otyryp, saý deneli, sapaly urpaq tarbıeleýge óz úlesimizdi qosý. Qazir qanshama jastarymyz ishimdikke salynyp, ártúrli zııandy shegimdiktermen ózderin «ýlap» júrgenin kórip júrmiz. Biz osyndaı jarystar ótkizý arqyly jastardy sportqa tartyp, bolashaq chempıondar daıyndaýdy kózdep otyrmyz.

Úshinshiden – alys-jaqyn elderden boksshylar shaqyra otyryp, sport – dostyq pen birliktiń, tatýlyq pen uıymshyldyqtyń altyn qazyǵy ekenin kórsete bilý.

- Osyǵan deıin de Astana, Almaty qalalarynda jarystar uıymdastyrǵanyńyz esimizde. Biraq, bul joly araǵa biraz ýaqyt salyp, boks keshterin jalǵastyrýdy qaıta qolǵa alyp jatyrsyz. Bul boks keshinen burynǵy jarystardan qandaı artyqshyqty kóre alamyz?

- Meniń jalpy boksta, ıaǵnı sportta júrgenimen 30 jyl bolypty. Sonyń sońǵy 11 jylyn negizinen Amerıkada ótkizdim. Onda tek judyryqtasyp qoıǵan joqpyn. Osy sporttyń qyr-syryn oqydyq, úırendik. Úırene júrip, judyryqtasa júrip, shákirt tárbıeleý, bolashaqta qazaq boksshylarynan chempıondar shyǵarý, qazaq sportynyń damýyna ózimizdiń bir kisilik úlesimizdi qosýdy da esten shyǵarmadyq.

Endi, mine sol tájirıbemizdi pisirip, elimizdiń sportyn damytýǵa jumsasaq degen nıettemiz. Bul boks keshi burynǵy jarystarǵa qaraǵanda mańyzy jaǵynan da, deńgeıi jaǵynan da asa salmaqty bolmaq. Sebebi – biz qalaaralyq emes, halyqaralyq deńgeıde uıymdastyrǵaly otyrmyz.

- Alda taǵy qandaı jarystar ótkizý josparda bar?

- Josparymyz kóp, bolashaqta elimizdiń ár aımaǵy men aýylyndaǵy qazaqtyń qaradomalaq balalaryn sportqa baýlý, tárbıeleý, bolashaq chempıondar shyǵarý basty maqsatymyz bolyp qala beredi. Aldymen osy jekpe-jek keshin sátti ótkizip alsaq degen nıettemiz.

- Aldaǵy jekpe-jek keshine shetelden qandaı boksshylar keledi?

- Shetelden qandaı boksshylar keletinin jaqyn arada naqtylap aıtatyn bolamyz.

Boksshylarymyzdyń qarsylastarynyń deni ózge elden keledi. Qytaıdan eki qazaq, bir qytaı boksshysy qatysady. Jankúıer retinde kelemiz dep habarlasyp jatqan qandastarymyzdyń qatary da kóp. Ózge de elderden osy boks keshine qonaq retinde, jankúıer retinde kelemiz deýshiler jıilep jatyr.

Mine, osynyń barlyǵy Prezıdentimiz Qasym-Jomart Toqaevtiń salıqaly saıasatynyń arqasy der edim. Kórshi eldermen yntymaǵymyzdy jarastyryp otyrǵan Prezıdentimizge myń alǵys.

Sonyń arqasynda kórshi elderden qanshama jankúıerler keleıin dep jatyr. Sondyqtan qazaq elin, boks jankúıerlerin aldaǵy boks keshine shaqyramyz. 

- Áńgimeńizge rahmet!