Sanatorıı men kýrortqa joldamany qalaı alýǵa bolady

ASTANA. QazAqparat – Densaýlyq saqtaý mınıstrligi sanatorıı men kýrortqa barýǵa joldamany qalaı alýǵa bolatynyn túsindirdi, dep habarlaıdy QazAqparat tilshisi.

«Joldama alý úshin emhanadaǵy tirkelgen jeri boıynsha ýchaskelik dárigerge (jalpy praktıka dárigeri) barý qajet. Bul rette, patsıent tıisti tekserýden ótedi (qan, zár jalpy taldaýy, EKG, flıýorografııa jáne aýrýǵa baılanysty basqa da tekserýler). Osydan keıin naýqas «aýrýhanaǵa jatqyzý bıýrosy» portalynda bekitiledi», - delingen Densaýlyq saqtaý mınıstrligi málimetinde.

Atap aıtqanda, densaýlyq saqtaý júıesinde sanatorıı-kýrorttyq emdeýge joldama negizgi aýrý boıynsha belgiler bolǵan kezde beriledi.

Budan buryn habarlanǵandaı, Densaýlyq saqtaý mınıstrligi sanatorıı men kýrortqa kimder tegin bara alatynyn túsindirdi.

Sanatorıı-kýrorttyq emdeý - bul medıtsınalyq ońaltýdyń úshinshi kezeńinde usynylatyn saýyqtyrý túri.

«Bul rette, Medıtsınalyq-sanıtarlyq alǵashqy kómek (MSAK) uıymdarynda, kúndizgi statsıonarlarda, ońaltý ortalyqtarynda, sanatorıı-kýrorttyq uıymdarda Tegin medıtsınalyq kómektiń kepildendirilgen kólemi (TMKKK) jáne Mindetti áleýmettik medıtsınalyq saqtandyrý (MÁMS) júıesi aıasynda, onyń ishinde qashyqtan medıtsınalyq qyzmet kórsetý arqyly usynylady», - dep atalyp ótken mınıstrlik jaýabynda.