Sanat Kóshkimbaev: AQSh-qa Qazaqstanmen seriktestikti keńeıtý mańyzdy bolyp tur

NUR-SULTAN. QazAqparat - QR Prezıdenti janyndaǵy Qazaqstan strategııalyq zertteýler ınstıtýty dırektorynyń orynbasary, saıasattaný ǵylymynyń doktory, dotsent Sanat Kóshkimbaev AQSh-tyń Memlekettik hatshysy Maık Pompeonyń Qazaqstanǵa saparyna baılanysty pikir bildirdi, dep habarlaıdy QazAqparat tilshisi.

«AQSh Memlekettik hatshysy Maık Pompeonyń Qazaqstanǵa jumys saparymen kelýi óte mańyzdy ról atqarady, sebebi AQSh Memlekettik hatshylary elimizge sońǵy ret bes jyl buryn kelgen. Bul - Qazaqstan úshin de, AQSh úshin de mańyzdy jańalyq»,- deıdi Sanat Kóshkimbaev.

Ol AQSh-tyń Memlekettik hatshysy Ortalyq Azııa memleketteri ishinde eń aldymen Qazaqstanǵa kelgenin aıtty.

«Ol aldymen Nur-Sultan qalasyna keldi, odan keıin ǵana búgin S5+1 formatyndaǵy mınıstrler kezdesýine qatysý úshin Tashkentke bardy. Qazaqstan - AQSh-tyń ınvestıtsııa kólemi, ózara saýda-sattyq, qaýipsizdik salasynda jumys isteý boıynsha strategııalyq seriktesi. Bul týraly Memleket basshysymen jáne QR Tuńǵysh Prezıdenti - Elbasy Nursultan Nazarbaevpen kezdesý barysynda aıtyldy. AQSh úshin seriktestiktiń osy deńgeıiniń saqtalyp qalýy ǵana emes, keńeıýi jáne tereńdeı túsýi mańyzdy», - deıdi ol.

Onyń aıtýynsha, Maık Pompeonyń Qazaqstanǵa kelýi - AQSh-tyń qostarapty, sondaı-aq Ortalyq Azııada kóptarapty áreket etý formatyna daıyn ekenin bildiredi.

«Meniń oıymsha, aımaqtaǵy jaǵdaıdy, sonyń ishinde Ózbekstanda júzege asyrylyp jatqan reformalardy jáne Qazaqstandaǵy tranzıtke baılanysty reformalardy eskersek, qazir osyndaı baılanys ornatýǵa eń qolaıdy ýaqyt. Tuńǵysh Prezıdent - Elbasy Nursultan Nazarbaev kezdesý barysynda AQSh-tyń bes memlekettik hatshysymen kezdeskenin aıtyp ótýi - kezdeısoqtyq emes. AQSh úshin jemisti qarym-qatynas ornatý mańyzdy ekeni belgili. Bul jolǵy kezdesý solaı bolǵanyn aıta ketý kerek. Bul týraly AQSh Memlekettik hatshysy Tvıtterde jazdy. Qazaqstandyq tarap ta kezdesý joǵary deńgeıde ótkenin aıtady», - deıdi Sanat Kóshkimbaev.

QR Syrtqy ister mınıstri sońǵy jarty jyl ishinde AQSh Memlekettik hatshysymen tórt ret kezdesken. Sarapshy buǵan da nazar aýdaryp otyr.

«Bul da Qazaqstan men AQSh arasynda jemisti qarym-qatynas ornaǵanyn bildiredi. Prezıdent Qasym-Jomart Toqaev AQSh Prezıdenti Donald Tramppen qysqasha áńgimeleskenin aıtyp ótý kerek. Sondyqtan bul baılanys keńeıe túsedi jáne tereńdeı beredi. QR Premer-Mınıstri Asqar Mamınniń jáne basqa da basshylardyń AQSh-qa barýy únemi ónimdi sıpatqa ıe bolyp keledi», - deıdi ol.