«Samuryq-Qazyna» tabysynyń kem degende 7% «Qazaqstan halqyna» qoryna aýdarady
Memleket basshysy «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
«Memlekettik satyp alý týraly» zańǵa túzetýler engizildi. Sybaılas jemqorlyq táýekelderin azaıtý jáne básekelestikti damytý maqsatynda bir kózden alý quqyǵy alynyp tastalady:
- Memlekettik materıaldar rezervi taýarlary;
- jedel-izdestirý qyzmetine arnalǵan taýarlar men qyzmetter;
- ǵımarattar, turǵyn emes maqsattaǵy úı-jaılar.
Sondaı-aq, zańda «Samuryq-Qazyna» qorynyń satyp alý erejelerin Básekelestikti qorǵaý jáne damytý agenttigimen kelisý, jetkizýshilerdiń satyp alýǵa qatysty shaǵymdaný quqyǵy jáne qordyń ishki kooperatsııa sheńberinde satyp alýdy alyp tastaý mindeti kózdeledi.
Memlekettik satyp alý rásimin aınalyp ótýdi boldyrmaý maqsatynda memlekettik-jekeshelik áriptestik jobalarynyń aıryqsha krıterııi engiziledi. Jobada eki kezeń mindettelgen, ıaǵnı obektini jeke áriptestikte qurý jáne paıdalaný.
Sýpermarjınaldylyqty tómendetý jáne táýekelderdiń memleket pen jeke sektor arasyndaǵy teńgerimdi bólinýin qamtamasyz etý úshin ınvestıtsııalyq shyǵyndardyń ótemaqysyn tóleý alynyp tastalady. Sol sııaqty qosa qarjylandyrý boıynsha shekteýler engizilip, kvazımemlekettik sektor sýbektileriniń jeke áriptester retinde qatysýy úshin tosqaýyl belgilenedi.
Sybaılas jemqorlyq áreketin baqylaýdy kúsheıtý sheńberinde memlekettik-jekeshelik áriptestik jobalaryn josparlaý jáne iske asyrý protsesiniń ashyqtyǵy qaǵıdatyn engizý kózdeledi. Memlekettik-jekeshelik áriptestik jobalaryn iske asyrý kezinde monopolııaǵa jol bermeý maqsatynda mindetti túrde quzyrly organmen kelisý kózdeledi.
Sondaı-aq, «Tabıǵı monopolııalar týraly» Zańǵa túzetýler engizildi.
- Qyzmetterdi usyný kezinde tehnologııalyq tsıklde paıdalanylatyn jeliler men múlikti teńgerimge jáne senimgerlik basqarýǵa alǵan jaǵdaıda tarıfti qoldanylý merzimi aıaqtalǵanǵa deıin ózgertý múmkindigi;
- tsıfrlandyrý arqyly tarıf belgileý protsesiniń ashyqtyǵyn arttyrý.
«Ulttyq ál-aýqat qory týraly» Zańǵa da tolyqtyrýlar engizildi. «Samuryq-Qazyna» qory Úkimettiń sheshimi boıynsha jyl saıyn qordyń taza tabysynyń keminde 7% «Qazaqstan Halqyna» qoǵamdyq qoryna aýdaratyn bolady.
Odan bólek, zańda arnaıy ekonomıkalyq jáne ındýstrııalyq aımaqtar týraly zańnamany jetildirý, jaldaý tólemderin sýbsıdııalaý jónindegi tetik sheńberinde shottardy qorǵaý, sheteldik avtomobılderdi ákelý men paıdalanýdyń jekelegen máselelerin retteý, qurylys úshin jobalardy vedomstvodan tys keshendi saraptaý taǵy sol sııaqty jaıttar qarastyrylǵan.
