«Samuryq-Qazyna» byltyr 458 mlrd teńgeniń taza tabysyn tapty

ASTANA. QazAqparat -«Samuryq-Qazyna» Ulttyq ál-aýqat qory» AQ kompanııalarynyń 2014 jylǵy taza tabysy 458 mıllıard teńgeni qurady. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte málim boldy.

Qor basshysy Ómirzaq Shókeevtiń aıtýynsha, jalpy 2014 jylǵy jumystyń qorytyndysy jaman bolǵan joq.

«Daǵdarys bastalǵan jyl bolǵanyna qaramastan, «Samuryq-Qazynanyń» taza tabysy 458 mlrd teńgeni qurady. Bul rette Qorǵa qarasty kompanııalar tıimdiliginiń basty ólshemi sanalatyn operatsııalyq tabystyń kórsetkishi 19,52 paıyzdy qurady. Tutastaı alǵanda Qorǵa qarasty kompanııalar byltyrǵy jyly jalpy quny 2 mlrd 900 mln dollardy quraıtyn 13 jobany iske asyrdy», - dedi Ómirzaq Shókeev.

Onyń sózine qaraǵanda, jobalardy júzege asyrý nátıjesinde 5 myń 600 ýaqytsha jáne 1 myń 200 turaqty jumys orny qurylǵan.