«Samuryq-Qazyna» 2022 jyly qansha tonna munaı eksporttady

ASTANA. QazAqparat – 2022 jylǵy syrtqy syn-tegeýrinderge qaramastan «Samuryq-Qazyna» qorynyń kompanııalar toby operatsııalyq jáne qarjylyq nátıjelerin jaqsartty. Bul týraly atalǵan qordyń ekonomıka jáne qarjy jónindegi dırektory Nazıra Nurbaeva málim etti, dep habarlaıdy QazAqparat tilshisi.

«Ózderińiz de biletindeı, 2022 jyl kúrdeli boldy. Kompanııa joǵary ınflıatsııa, geosaıası syn-tegeýirinder jaǵdaıynda jumys istedi, qańtar oqıǵasy boldy. Degenmen, syrtqy syn-tegerýinderge qaramastan 2022 jyly toptyń jalpy operatsııalyq jáne qarjylyq nátıjesi jaqsardy», - dedi ol qorda ótken baspasóz máslıhatynda.

Onyń atap ótýinshe, ótken jyly munaı óndirý jáne óńdeý kólemi artty.

«Munaı óndirý kólemi 2021 jylǵy kórsetkish deńgeıinen joǵary bolyp, 22 mln tonnany qurady. Syrtqy syn-tegeýirinderge, onyń ishinde Kaspıı qubyr konsortsıýmymen munaı tasymaldaýdaǵy irkiliske qaramastan tasymal kólemi tómendegen joq. Azdaǵan ósim bar. QazMunaıGazdyń munaı óńdeý zaýyttary 2022 jyly shamamen 20 mln tonna munaı óńdedi. Bul 2021 jylǵy kórsetkishten 5,7 paıyzǵa joǵary», - dedi Nazıra Nurbaeva.