«Samuryq-Qazyna» qory bıyl memleketke qansha dıvıdend tóledi

ASTANA. KAZINFORM – «Samuryq-Qazyna» qory bıyl 1,8 trln teńge taza tabys tapty jáne memlekettik bıýdjetke 1,3 trln teńge aýdardy. Bul týraly «Samuryq-Qazyna» AQ basqarma tóraǵasy Nurlan Jaqypov aıtty.

— Bizdiń aktıvterimizdiń quny 38 trln teńgeni quraıdy. Aldaǵy maqsatymyz ony 50 trln teńgege jetkizý. Bıylǵy kirisimiz — 17 trln teńge. Byltyrǵymen salystyrǵanda bul 10 paıyzǵa joǵary, - deıi ol.

Tóraǵanyń aıtýynsha, bıyl ekonmıkalyq turǵyda kúrdeli jyl bolǵan: 

— Munaı baǵasy arzandady. Kúrdeli geosaıası jaǵdaı boldy. Degenmen, boljamymyzǵa sáıkes taza tabysymyz 1,8 trln teńgeni quraıdy. Bul kórsetkish byltyrǵymen salystyrǵanda joǵary, - basqarma tóraǵasy Nurlan Jaqypov. 

Odan bólek, Nurlan Jaqypov qor memlekettik bıýdjetke qomaqty qarjy jibergenin aıtty. 

— «Samuryq-Qazyna» AQ bul jyly memlekettik bıýdjetke 1,3 trln teńge aýdardy. Onyń ishinde 579 mlrd teńgeni dıvıdent retinde tóledik. 228 mlrd teńge áleýmettik jobalardy qarjylandyrýǵa berildi. Bul aqsha medıtsına ortalyqtaryn, turǵyn úıler jáne basqa da mańyzdy nysandardy salýǵa jumsaldy. 105 mlrd teńge eldimekenderdi gazdandyrýǵa ketti. 272 mlrd teńge jalǵa beriletin turǵyn úılerdi salýǵa jumsaldy. Sonymen qatar «Samuryq-Qazynanyń» kompanııalary 2 trln teńgeden astam somany memlekettik bıýdjetke salyq retinde tóleıtin bolady. Bul — respýblıkalyq bıýdjetke salyqtardan túsken kiristerdiń 16 paıyzy, - deıdi qor basshysy.

Aıta keteıik, byltyr «Samuryq-Qazyna» AQ memleketke 460 mlrd teńge dıvıdend tólegen bolatyn. ıAǵnı bıylǵydan 119 mlrd teńge az. 

Alaıda, 2023 jylǵy taza tabys bıylǵydan sál joǵary bolǵan.